07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Արմավիրում 3 տարեկան երեխայի պատանդ վերցրած տղամարդը վնասազերծված է, երեխան՝ ազատ արձակված. նոր մանրամասներ
30.10.2017 | 19:24
«Մանուշակ» մանկապարտեզի շուրջ իսկական ընտանեկան դրամա է ծավալվում՝ քրեական դրսևորումներով։ Մեր տեղեկություններով՝ Արմավիր քաղաքում գտնվող այս մանկապարտեզում, որտեղ այժմ իրավապահները փորձում են դանակով զինված տղամարդու ձեռքից խլել երեխային, աշխատում է պատանդառու տղամարդու նախկին կինը։ Նա դաստիարակչուհի է, իսկ մանկապարտեզի տնօրենը՝ Ռոզա Վարդանյանը, պատանդառուի զոքանչն է։
Տղամարդը, որի անունը Արգամ Հոկտանյան է, երեք տարեկան տղա երեխային պատանդ է վերցրել և իր զոքանչից պահանջում է աղջկան՝ այսինքն իր կնոջը, վերադարձնել իրեն։
Քիչ առաջ հայտնի դարձավ, որ մանկապարտեզում վիրավորներ կան։ Պատանդառուն վնասել է նախկին կնոջն ու զոքանչին, նրանց դեռ չի հաջողվում տեղափոխել հիվանդանոց: Մեր տեղեկություններով նրանց վնասվածքներ են հասցվել կոկորդի հատվածներում:
Այս պահին պատանդառու տղամարդու հետ բանակցում է ՀՀ ոստիկանապետի տեղակալ Հունան Պողոսյանը, իսկ պատանդառված երեխայի ծնողները, ինչպես նաեւ մանկապարտեզի մնացած երեխաների ծնողները հավաքվել են մանկապարտեզի բակում: Թեեւ տեղում են մեծ թվով ոստիկանության աշխատակիցներ, սակայն դեպքի վայրում չկա որեւէ հոգեբան, որը կաշխատեր երեխաների ծնողների հետ:
20:12
Վայրկյաններ առաջ պատանդառու տղամարդուն ոստիկանները վնասազերծել են եւ ազատ արձակել պատանդառված երեքամյա երեխային: Վիրավորներին տեղափոխում են հիվանդանոց:
20:25
ՀՀ ոստիկանապետի տեղակալ Հունան Պողոսյանի փոխանցմամբ՝ պատանդառու տղամարդը փորձել է ինքնավնասում իրականացնել, ինչը կանխելու նպատակով նրան հատուկ միջոցի կիրառմամբ վնասազերծել են: Փոխոստիկանապետը նաեւ հայտնեց, որ երեխայի վիճակը լավ է, նրան որեւէ ֆիզիկական վնաս չի պատճառվել: Այս պահին ոստիկանության բարձրաստիճան աշխատակիցները հեռանում են դեպքի վայրից:
