03.07.2026 | 05:09
ԱԱ-2026. Պորտուգալիան հաղթանակ կորզեց ու կխաղա Իսպանիայի հետ. ՏԵՍԱՆՅՈՒԹ
ԵՄ-ի հետ վիզաների ազատականացման հարցում ԱԳ նախարարը լավատեսական է տրամադրված
Քաղաքականություն
09.03.2020 | 20:21
ԵՄ նոր ղեկավարության հետ ամփոփել ենք երկկողմ հարաբերությունների օրակարգը, վերահաստատել այն գերակա կետերը, որոնք կան օրակարգում։ Այս մասին Բրյուսելում լրագրողների հետ զրույցում ասել է ԱԳ նախարար Զոհրաբ Մնացականյանը։
Նա նշել է, որ քննարկվող թեմաների շարքում է եղել նաև վիզաների ազատականացման հարցը։ Նախարարը դժվարացել է հստակ ժամկետներ նշել, սակայն ընդգծել է՝ լավատեսական է տրամադրված և դրա համար առիթ կա։
«Հայաստանը որևէ կերպ չի քաջալերում, չի խրախուսում անօրինական միգրացիան, դա արտահայտվում է և՛ իրավական առումով, և՛ գործողությունների առումով։ Միևնույն ժամանակ, կա այն կարևորագույն քաղաքական նպատակը, որը վերաբերում է մարդկային շփումների ակտիվացմանը և ճանապարհորդելու հնարավորությունների ընդլայնմանը: Սա հիմքն է այն ամենի, ինչն արտահայտվում է վիզաների ազատականացման մեջ։ Պետք է հնարավորինս ամեն ինչ անենք, որպեսզի հնարավորություն տան մեզ՝ սկսել երկխոսությունը։ Մենք ի ցույց ենք դնում մեր պատրաստ լինելը այդ գործընթացին»,- նշել է նախարարը:
Նա հավելել է, որ կան հանգամանքներ, որոնք անմիջապես Հայաստանին ու ԵՄ-ին չեն վերաբերում. «Կա լայն ենթատեքստ, որը նույնպես որոշ չափով խոչընդոտում է քաղաքական այդ որոշումն ապահովելուն: Բայց ես ավելի լավատեսական եմ տրամադրված և կարծում եմ, որ առիթ ունեմ դրա համար։ Կարծում եմ՝ մոտ ժամանակներս կկարողանանք այդ ճեղքումն ապահովել»։
Եվրոպական խորհրդի նախագահ Շառլ Միշելի հետ հանդիպման ժամանակ անդրադարձ է եղել նաև Հայաստանի ներքին բարեփոխումներին և ՀՀ-ԵՄ համաձայնագրի իրականացմանը, ԵՄ-ի կողմից Հայաստանում տրվող ֆինանսավորմանը, ինչպես նաև տարածաշրջանային հարցերին։
«Անդրադարձանք CEPA-ի համաձայնագրի վավերացման գործընթացին: Ինչպես գիտենք՝ մնացել է 5 երկիր, որ պետք է վավերացնի, և մենք շատ ակտիվ քննարկում ենք իրենց հետ։ Սա ուղղակի մեր բնականոն երկխոսության շարունակությունն էր նոր ղեկավարության հետ»,- ընդգծել է նախարարը:
