«Վիգեն Սարգսյանը պետք է բացատրություն տա՝ ինչու չի զորակոչվել բանակ. նա սպա դարձել է որպես ռեֆերենտ ծառայելով». Անդրանիկ Քոչարյան

 Պաշտպանության նախկին փոխնախարար Անդրանիկ Քոչարյանը Factor.am-ի հետ զրույցում պնդում է, որ խորհրդարանի կողմից առաջին ընթերցմամբ ընդունված «Զինծառայության ու զինծառայողի կարգավիճակի մասին» օրինագիծը «ոչնչացնում է բանակում կրթված զինվոր ունենալու հնարավորությունը»:

«Բացարձակ կրթությունը չէ բանակից խուսափելու թիրախը»,- ասաց փոխնախարարը: Նրա խոսքերով՝ ընդհանրապես պետք է ռադիկալ ձևով լուծել առաջնագծից 18 տարեկաններին հանելու հարցը: «18 տարեկան երեխան դեռ պատերազմին պատրաստ չէ»,- ընդգծեց Քոչարյանը:

Ըստ պաշտպանության նախկին փոխնախարարի՝ ավելի մեծ խնդիր է այն, որ այսօր բանակում կան զինվորներ, որոնք գրանցված են որպես զինծառայող, սակայն իրականում չեն ծառայում: Նաև կան զորամասեր, որտեղ ծառայելու համար պաշտոնյաների լուրջ միջնորդություններ են պետք:

Անդրադառնալով պաշտպանության նախկին նախարար Սեյրան Օհանյանի կնոջ՝ Ռուզաննա Խաչատրյանի ֆեյսբուքյան գրառմանը, որում նա անուն չնշելով՝ հիշեցրել էր հայրենասիրության և զինծառայության «դասեր տվող» մի պաշտոնյայի, որն ինքը 18 տարի առաջ դասալքության համար հետապնդվում էր, Անդանիկ Քոչարյանն ասաց, թե չի հավատում, որ խոսքը Վիգեն Սարգսյանի մասին է, քանի որ Վիգեն Սարգսայնն այն ժամանակ այնպիսի պաշտոնյաների օգնական է աշխատել, որ դժվար թե հետապնդվեր ռազմական ոստիկանության կողմից: Այնուհանդերձ՝ պաշտպանության նախկին փոխնախարարն ընդգծեց. «Վիգեն Սարգսյանը չի զորակոչվել բանակ: Նա պետք է բացատրություն տա՝ ինչու չի զորակոչվել բանակ: Որպես ռեֆերենտ ծառայելով՝ ստացել է սպայի կոչում, դա զորակոչի հետ որևէ կապ չունի»:

Քոչարյանի խոսքով՝ պետք է բացատրություն լինի, և դրանից է կախված, թե ինչպիսի հաջողություն կունենա Վիգեն Սարգսյանի ներկայացրած օրինագիծը:

Մանրամասները դիտեք պաշտպանության նախկին փոխնախարար Անդրանիկ Քոչարյանի հետ Factor.am-ի հարցազրույցում:

Մարինե Խառատյան