«Մեդիալաբն» իր հերթական ծաղրանկարով անդրադարձել է երեկ Երևանի մետրոպոլիտենում տեղի ունեցած մի միջադեպի, երբ քարոզարշավի ժամանակ երիտասարդ մի աղջիկ պատռել էր իրեն մեկնած քարոզչական բուկլետն ու նետել վարչապետ Փաշինյանի ուղղությամբ:
Ավելի ուշ վարչապետ Փաշինյանն անդրադարձել էր միջադեպին՝ գրելով. «Ես սա համարում եմ «Այո»-ի ամենամեծ քարոզչությունը, որովհետեւ այս երիտասարդ կնոջ անվտանգությանը ոչինչ չի սպառնում, նրան անզգույշ չեն քաշքշում մոտակա զուգարանում, նա շարունակելու է ապրել իր բնականոն կյանքով, ազատ արտահայտելու է իր տեսակետը, աշխատանքից չի ազատվելու, որովհետեւ ապրում է եւ ապրելու է Ազատ եւ Երջանիկ Հայաստանում»:
Վարչապետն իր խոսքում ակնարկել էր Պողոս Պողոսյանի սպանությունը, որին Ռոբերտ Քոչարյանի հետևից «Պրիվետ Ռոբ» գոչելու համար «Առագաստ» սրճարանի զուգարանում դաժանորեն ծեծելով սպանել էին:
«Նա Հայաստանի Հանրապետության Հպարտ քաղաքացի է։ Եվ ես` որպես Հայաստանի Հանրապետության վարչապետ, իմ պարտքն եմ համարում ապահովել նրա իրավունքների լիարժեք իրացումը։ Դուխով ժողովուրդ ջան, դուխով։)»,- իր խոսքն ավարտել էր վարչապետը:
