Քաղաքականություն
05.03.2020 | 16:48
Կրեմլում ընթանում են ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի բանակցությունները: Այս մասին հաղորդում է ՌԻԱ Նովոստին:
Հանդիպումն անցկացվում է դեմ առ դեմ ձևաչափով: ՌԴ նախագահը թուրք գործընկերոջը ցավակցել է Սիրիայում թուրք զինծառայողների զոհվելու կապակցությամբ՝ հայտարարելով, որ Իդլիբում տիրող իրավիճակն ուղիղ անձնական զրույց է պահանջում:
«Ինչպես խնդրել էիք՝ մենք պատրաստ ենք դեմ առ դեմ զրույց սկսել, իսկ հետո, անհրաժեշտության դեպքում, ներգրավել մեր գործընկերներին»,- հանդիպման մեկնարկին ասել է Վլադիմիր Պուտինը:
Էրդողանն իր հերթին ընդգծել է, որ հիմնական խնդիրը Մոսկվայի և Անկարայի հարաբերությունները զարգացնելն է, որոնք վերջին շրջանում «գագաթնակետին են հասել»:
«Մեր այսօրվա հանդիպումը՝ կապված իդլիբյան բանակցությունների հետ, մեծ նշանակություն ունի: Իսկապես, Իդլիբում հիմա շատ լարված իրադրություն է: Ամբողջ աշխարհը հայացքն այսօր ուղղել է դեպի այստեղ՝ Մոսկվա: Կարծում եմ՝ այն քայլերը, որոնք այսօր կձեռնարկվեն, և մեր լուծումները, անկասկած, կթեթևացնեն իրադրությունը»,- հավելել է Թուրքիայի նախագահը:
Նշենք, որ Մոսկվա է ժամանել թուրքական բավականին ներկայացուցչական պատվիրակություն: Էրդողանին ուղեկվում են Թուրքիայի արտաքին գործերի, պաշտպանության, ֆինանսների նախարարները, ինչպես նաև ազգային հետախուզական ծառայության ղեկավարը:
