Քաղաքականություն
20.02.2020 | 12:48
Վրաստանի նախկին վարչապետ, ՆԳ նախկին նախարար Վանո Մերաբիշվիլին ազատության մեջ է: Նա բանտում անցկացրել է 6 տարի 9 ամիս: Նա արդեն հայտարարել է, որ որոշել է վերադառնալ քաղաքականություն, հաղորդում է «Սպուտնիկ Գրուզիա»-ն:
Մերաբիշվիլին նշել է, որ պայքարելու է իշխանության դեմ, սակայն չի նշել, թե ընդդիմադիր որ կուսակցության շարքերում է լինելու: Նշենք, որ բանտից դուրս գալիս նրան դիմավորել «Ազգային շարժում», «Եվրոպական Վրաստան» և մի շարք այլ ընդդիմադիր կուսակցությունների առաջնորդներ և ակտիվիստներ:
«Ուզում եմ շնորհակալություն հայտնել իմ բոլոր կողմնակիցներին, մտերիմներին, նրանց, ովքեր այստեղ են և նրանց, ովքեր սատարում են ինձ հեռվից: Նրանց աջակցությամբ և ապագայի հանդեպ հավատով ես պահպանել եմ ուժերս, էներգիաս, հույսն ու հավատը, որպեսզի շարունակեմ պայքարել՝ արդեն այս տարի այս ռեժիմին վերջ դնելու համար»,- լրագրողներին ասել է Մերաբիշվիլին:
Նա, սակայն, չի նշել, թե ում հետ է համագործակցելու:
«Ինչ վերաբերում է կուսակցությանը, ես այդ մասին հայտարարություն չեմ արել, քանի որ մեկուսացված էի, հեռու էի ընթացիկ գործընթացներից»,- ասել է Վանո Մերաբիշվիլին՝ հավելելով, որ կհանդիպի բոլորի հետ և դրանից հետո միայն որոշում կկայացնի:
Մինչև ազատազրկումը Վանո Մերաբիշվիլին նախկին իշխող «Միացյալ ազգային շարժում» կուսակցության գլխավոր քարտուղարն էր: 2017 թվականին, կուսակցության պառակտումից հետո, նա հրաժարվեց այդ պաշտոնից, և մի շարք փորձագետներ ենթադրում էին, որ նա կմիանա «Եվրոպական Վրաստան. շարժում հանուն ազատության» կուսակցությանը:
