Սահմանադրական դատարանի գլխատումը շատ վատ տեղ է տանելու․ Արսեն Բաբայան. ՏԵՍԱՆՅՈՒԹ

Սահմանադրական հանրաքվեի «Ոչ»-ի ճակատի ներկայացուցիչ, իրավաբան Արսեն Բաբայանը կարծում է, որ ինքը անօրինականության մասնակից չի դառնում այն պարագայում, երբ հայտարարում է, որ հանրաքվեի նշանակումը հակասահմանդրական է:

«Ո՛չ, որովհետև նույնն է, թե ասել, որ, օրինակ, պաշտպանյալին ակնհայտ անօրինական մեղադրանք են առաջադրում, ուստի փաստաբանը չպետք է պաշտպանի նրան։ Հիմա մենք, մեր կամքից անկախ, ունենք հակասահմանադրական և հակաօրինական ճանապարհով նշանակված հանրաքվե, որը, մեր գնահատմամբ, ունի հանրային պաշտպանության անհրաժեշտություն և դա է պատճառը, որ ստանձնեցինք այս դերը»,- Factor TV-ի հարցազրույցում ասում է իրավաբանը։

Նա կարծում է՝ իրենց մասնակցությամբ հանրաքվեի գործընթացը չեն լեգիտիմացնում․ «Մենք քաղաքական ուժ չենք, մենք մասնակցում ենք արդեն իսկ փաստացի, տեղի ունեցող գործընթացին։ Հանրային պաշտպանությունը չստանձնելով՝ մենք չենք ստեղծի այն հնարավորությունները, որոնք մեզ հետագայում կտան վերահսկելի պահել հանրաքվեի ողջ գործընթացը»։

Խոսելով հանրաքվեի քարոզարշավին մասնակցությունից, Բաբայանն ասում է, որ իրենք դասական առումով քարոզչություն չեն իրականացնում՝ չեն գնալու մարզեր, չեն քարոզելու, քաղաքացիներին չեն ասելու քվեարկեք՝ «այո» կամ «ոչ»։ Բաբայանն ասում է, որ ԿԸՀ-ում գրանցվելով՝ իբրև «ոչ»-ի կողմ, ստանում են որոշ իրավունքներ ու հնարավորություններ, օրինակ՝ անվճար եթերի։

Արսեն Բաբայանը մտահոգ է Սահմանադրական դատարանի ճակատագրով․ «Սահմանադրական դատարանը գլխատելը և նոր, ցանկալի դատավորներով հագեցնելը, շատ վատ տեղ է տանելու։ Եթե մենք այս ապօրինությունը հանդուրժենք, կանգնեցնենք, ապա հետո շատ ավելի վատ հետևանքների առաջ ենք կանգնելու, ինչը որ հիմա եղավ։ Ես զգուշացնում էի՝ եթե այսպես շարունակենք, եվրոպական գործընկերների քննադատությանն ենք արժանանալու, ինչը մենք տեսանք։ Տեսեք, թե Լեհաստանում ինչ սանկցիաներ է կիրառել ԵԽԽՎ-ն, մեզ էլ է դա մեզ սպասվում»։

Արսեն Բաբայանը մատնացույց է անում, որ այսօրվա ՍԴ-ի կազմում աշխատում են նույնիսկ Լևոն Տեր-Պետրոսյանի նշանակած դատավորները, և հիշեցնում է, որ որևէ իշխանություն ՍԴ-ի մեծամասնությանը երբեք չի հեռացրել ու իր ցանկալի դատավորներին չի նշանակել․ «Ենթադրում եմ՝ այդպիսի միտք էլ չեն ունեցել։ Այս իշխանությունը նախ՝ ինքը կօգտվի առիթից, կնշանակի իր ցանկալի դատավորներին։ Կստեղծվի նախադեպ, որ հետագայում բոլոր իշխանությունները նույն գործընթացը իրականացնեն»,- ասաց «Ոչ»-ի ճակատը համալրած իրավաբանը։

Մանրամասները՝ տեսանյութում:

Ռոբերտ Անանյան