20.01.2026 | 17:43
«Երեխաներից գոնե ամաչեք․ բա չհետաքրքրացնե՞մ մեր նիստը»․ Ռուբինյանը՝ Կյուրեղյանին․ ՏԵՍԱՆՅՈՒԹ
ԵՄ-ի հետ առևտրի ծավալները նվազում են՝ ի հաշիվ ԵՏՄ-ի, սա մեզ պետք է անհանգստացնի. տնտեսագետ
Տնտեսություն
19.02.2020 | 16:36
2019 թվականին ժողովրդագրության առումով դրական տեղաշարժեր կան, ինչը բավական կարևոր է երկրի զարգացման համար: Լրագրողների հետ հանդիպմանը նման տեսակետ հայտնեց տնտեսագետ Բագրատ Ասատրյանը՝ ընդգծելով, որ նախորդ տարիներին Հայաստանում դեպի վատը խորացող իրավիճակ ունեինք:
«2017-18 թվականներին Հայաստանի որոշ մարզերում արդեն գործ ունեինք դեպոպուլյացիայի հետ, այսինքն՝ մահերն ավելի շատ էին, քան ծնունդները։ Անցած տարվա ընթացքում դրական տեղաշարժեր կան, սպասումներից ավելի բարձր ծնունդներ ունեցանք: Իհարկե՝ սա չի նշանակում, որ խնդիրներն ամբողջովին լուծվել են, բայց արդեն դինամիկան այն է, որ շտկվում է։ Սա շատ կարևոր է»,- ասաց տնտեսագետը։
Այնուամենայնիվ, 2019-ի տնտեսական տարին ամփոփելով՝ տնտեսագետը որոշ մտահոգիչ ցուցանիշներ է տեսնում: Ըստ նրա՝ անհանգստացնող է, որ արտահանման ծավալների աճի տեմպն ավելի ցածր է, քան ներմուծման ծավալներինը։
«Զգալի տեղաշարժեր ենք ունեցել նաև արտաքին առևտրի աշխարհագրության տեսանկյունից: Եվրամիության հետ առևտրի ծավալները նվազում են՝ ի հաշիվ ԵՏՄ-ի: Հասկանալի է, որ ԵՏՄ-ն նոր հնարավորություններ է ստեղծում, բայց սա մեզ պետք է անհանգստացնի»,- ասաց Բագրատ Ասատրյանը:
Արտահանման ու ներկրման տեսանկյունից նա անհանգստացնող է համարում նաև Հայաստանն ու Ռուսաստանը կապող Լարսի ճանապարհի վիճակը. «Լարսը դժոխքի ճանապարհ է, դա այն ճանապարհը չէ, որը կարող է ապահովել տնտեսական քիչ թե շատ խելամիտ զարգացումը: Սահմանին 100-ավոր մեքենաներ են կանգնած»։
Բագրատ Ասատրյանը դրական է գնահատում տնտեսական աճի ցուցանիշի բարձրացումը, բայց պնդում է, որ մանրակրկիտ ուսումնասիրության առարկա պետք է լինի, թե որն է աճը, որտեղից է, ինչով է պայմանավորված: Ըստ նրա՝ այս տարի ևս արդյունաբերության մեջ որոշիչ է դառնում հանքարդյունաբերությունը, ինչն առանձնապես շատ բան չի տալիս Հայաստանի տնտեսությանը։
«Տարվա կտրվածքով՝ արդյունաբերության աճը 9 տոկոս է, հանքարդյունաբերությունը՝ 24 տոկոս, մինչդեռ մշակվող հանքարդյունաբերությունը՝ 7.6 տոկոս, այսինքն՝ ավելի ցածր, քան տնտեսական աճի տեմպերը, արդյունաբերության աճի տեմպերը։ Մանրակրկիտ ուսումնասիրության առարկա պետք է լինի՝ որտեղից է աճը, ինչով է պայմանավորված։ Հանքարդյունաբերությունն ընդամենը այն է, թե ինչքան են ընդերքից հանել, կարող է մի երկու կոպեկ բյուջե փող մտնի, բայց ոչ մի ավելի բան Հայաստանի տնտեսությունը չի ստանում»,- կարծում է Բագրատ Ասատրյանը:
