12.06.2026 | 01:05
ԱԱ-2026․ Երեք կարմիր քարտ ու տանտերերի հաղթանակ՝ բացման խաղում․ ՏԵՍԱՆՅՈՒԹ
#Քարոզարշավ օր 1. «Այո»-ն ու «Ոչ»-ը լուռ են. ՏԵՍԱՆՅՈՒԹ
Քաղաքականություն
17.02.2020 | 17:04
Այսօրվանից մեկնարկել է պաշտոնական քարոզարշավը, մինչև ապրիլի 3-ը «Այո»-ն ու «Ոչ»-ը պիտի համոզեն ընտրողներին գնալ ընտրատեղամասեր։
«Այո»-ի նպատակը Հրայր Թովմասյանին ու ՍԴ 6 անդամներին հեռացնելն է, «Ոչ»-ինը՝ նրանց մնալը։ Այսօր, սակայն, թե՛ «Այո»-ի ու թե՛ «Ոչ»-ի շտաբների անդամները որոշել են չխախտել քաղաքացիների քաղաքական անդորրը։ Այսօրվա համար ոչինչ նախատեսված չէ։
Նախ՝ «Այո»-ի մասին։ Սահմանդրական դատարանի նախագահին ու 6 անդամներին պաշտոնից հեռացնելու գոծընթացի համար իշխանությունը 5 միլիոն դոլար կծախսի։ Նիկոլ Փաշինյանի բանաստեղծության հիման վրա գրված հեղափոխական «Իմ քայլը» հայտնի երգի հեղինակ-կատարող Հայկ Ստվերը դարձյալ Փաշինյանի խոսքերով կգրի քարոզարշավի երգը, իսկ լոգոն ու կարգախոսը մրցույթով կորոշվի, հաղթողին «Այո»-ի շտաբը խոստանում է 1-ից մինչ 3 միլիոն դրամ։
«Այո»-ի շտաբը կգլխավորի Տարածքային և ենթակառուցվածքների նախարար Սուրեն Պապիկյանը։ Երևանում աշխատանքները կհամակարգի «Իմ քայլը» խմբակցության պատգամավոր Սիփան Փաշինյանը, մարզերում՝ «Իմ քայլը» խմբակցության քարտուղար Հակոբ Սիմիդյանը։
«Այո»-ի շտաբից տեղեկացանք, որ արդեն իսկ բազում դիմումներ են ստացել բրենդինգի մրցույթի համար, հաղթողին կընտրեն փետրվարի 25-ին։ Ինչ վերաբերում է «Ոչ»-ին, ապա խորհրդարանական ընդդիմությունը զերծ մնաց «Ոչ»-ի շտաբ ձևավորելուց։ ԼՀԿ-ն ու ԲՀԿ-ն հայտնեցին՝ որ իրավական գործընթացը իրենց մասնակցությամբ չեն լեգիտիմացնի։ «Ոչ»-ի «սուրբ» տեղը, սակայն, դատարկ չմնաց։ Այն զբաղեցնելու հայտ ներկայացրին 100-ից ավելի իրավաբաններ՝ հանդես գալով քաղաքացիական նախաձեռնությամբ։ Սակայն նրանք էլ դեռ նախապատրաստական փուլում են։
«Իրավական ուղի» ՀԿ համահիմնադիր Ռուբեն Մելիքյանը factor.am-ին ասաց, որ ԿԸՀ-ում գրանցվել կարող են վաղվանից սկսած։ Օրն ու ժամը, թե երբ են գնալու, դեռ հստակ չգիտեն։ Մնացած անելիքների մասին, այսօր մի լավ քննարկելուց հետո հայտարարություն կտարածեն։
Արտախորհրդարանական ուժերից ՀՅԴ-ն ու ՀՀԿ-ն քաղաքացիներին կոչ են արել բոյկոտել ու չմասնակցել, իրենց ձևակերպմամբ, հակասահմանադրական գործընթացներին։
Իշխանությանը Սահմանադրության մեջ մեկ դրույթի փոփոխության և դրանով ՍԴ նախագահից ու 6 անդամներից ազատվելու համար անհրաժեշտ է շուրջ 650 000 քվե։
Այստեղ, սակայն, ուշագրավ է, որ 2018-ին «Իմ քայլը» դաշինքի օգտին քվեարկել է շուրջ 885 հազար քվե։ «Իմ քայլ» խմբակցությունում հիմա էլ վստահ են, որ շռնդալից հաղթանակ են տանելու։ Արդյունքները պարզ կլինեն ապրիլի 5-ին։
Մանրամասները՝ տեսանյութում։
Լիլիթ Շաբոյան
