20.01.2026 | 19:21
Դավթաշենում գտնվող ավտոտեխսպասարկման կետում ավտոմեքենա է այրվել
Թուրքիան Երուսաղեմի հայկական թաղամասը «գնելու» փորձեր է կատարում
Քաղաքականություն
14.02.2020 | 15:51
Թուրքիայի իշխանությունները Երուսաղեմի հայկական թաղամասում հատուկ գործունեություն են իրականացնում: Այս մասին հայտնում է JewishPress-ը։
Նշվում է, որ Թուրքիայի ներկայացուցիչները տեղի բնակիչների հետ հանդիպումների ընթացքում համոզում են, որ վերջիններս հրաժարվեն Հայոց ցեղասպանության հետ կապված պահանջներից, և փորձում են ստանալ նրանց սեփականությունը։
Տեղաբնակ Իլյա Կահաբադյանը, որը Հայոց ցեղասպանության մասին լուսանկարների և փաստաթղթերի հազվագյուտ հավաքածու ունի, JewishPress-ին պատմել է թուրք դիվանագետի հետ իր հանդիպման մասին:
Ըստ նրա՝ դիվանագետը փորձել է իրեն համոզել, որ դադարեցնի Հայոց ցեղասպանության իրազեկմանն ուղղված իր գործունեությունը։
Կահաբադյանի խոսքով՝ ինքը դիվանագետին մերժել է։ Նշվում է, որ թուրքական կողմը հայկական թաղամասը «գնելու» հարցը փորձում է նաև ֆինանսական միջոցների օգնությամբ լուծել։ Թուրքերը տեղի հայերին հազարավոր դոլարների դրամաշնորհներ են առաջարկում: Բացի այդ, առաջարկում են բարձր գներով գնել տեղաբնակների տները, սակայն մերժվում են:
JewishPress-ի փոխանցմամբ՝ Երուսաղեմում ավելացել է նաև թուրք զբոսաշրջիկների հոսքը: Իլյա Կահաբադյանի խոսքով՝ քաղաքում նրանք ոչնչացնում են Հայոց ցեղասպանությանը վերաբերող բոլոր պաստառները, ինչպես նաև շենքերի պատերին հայերին դատապարտող գրաֆիտիներ նկարում։
Նելլի Մելքոնյան
