14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Գյումրիի թիվ 9 դպրոցում դասերը ժամանակավոր դադարեցվել են. ջեռուցման խնդիր կա
Հասարակություն
14.02.2020 | 14:21
Մի քանի օր է՝ Գյումրիի թիվ 9 հիմնական դպրոցում դասերը դադարեցված են: Պատճառը ջեռուցման համակարգի խափանումն է, որի պատճառով վերջին օրերին դասասենյակները նորմալ տաքացնել չի հաջողվել, ջերմաստիճանը նորմայից ցածր է եղել:
Դասասենյակները փորձել ենե ջեռուցել էլեկտրական վառարաններով, սակայն բավարար ջերմաստիճան ապահովել չի հաջողվել: Կրճատել են նաև դասաժամերի տևողությունը՝ 45-ից հասցնելով 30 րոպեի, բայց դա էլ չի օգնել դասապրոցեսի անցկացմանը: Ստեղծված իրավիճակում որոշում է կայացվել դասերը որոշ ժամանակով դադարեցնել:
«Դպրոցում դասերը դադարեցված են, որովհետև մենք ունեցել ենք կրթության վարչության պետի հրահանգ՝ հետաձգել դասերը՝ շաբաթ օրերը լրացնելու պայմանով։ Ջեռուցման լոկալ համակարգի խափանման պատճառով են հետաձգվել դասերը»,- Factor.am-ի հետ զրույցում ասաց Գյումրու թիվ 9 հիմնական դպրոցի տնօրենի ժամանակավոր պաշտոնակատար Իրինա Բաղդասարյանը։
Նա նշեց, որ խնդիրը կաթսայատունն ու ջրախողովակներն են, որոնք արդեն 20 տարվա վաղեմության են։ Այժմ վերանորոգման աշխատանքներ են ընթանում:
«Մենք մտածում էինք՝ քիչ կտևի: Հիմա տեղում այդ հարցերով ենք զբաղված, պարզվում է՝ աշխատանքի ծավալը մեծ է։ Այս պահի դրությամբ աշխատանքներն ավարտված չեն»,- ասաց Իրինա Բաղդասարյանը։
Տնօրենի պաշտոնակատարի խոսքով՝ նախկինում միշտ էլ դասասենյակներում նորմալ ջերմաստիճան ապահովել են և նման խնդրի առջև չեն կանգնել։
«Դասասենյակներում ջեռուցումը նորմալ ապահովվում էր, բացի այս լոկալ համակարգից՝ նաև էլեկտրականությամբ էինք տաքացնում, այնպես որ՝ լրիվ նորմալ էր»,- նշեց Բաղդասարյանը՝ հավելելով, որ մինչև դասերը դադարեցնելը, այս սեզոնին բնորոշ սուր շնչական վիրուսների տարածմամբ պայմանավորված, բացակայությունները քիչ են եղել՝ 7-8 աշակերտ։
Նա, միաժամանակ, դժվարացավ ասել, թե կվերականգնվի նորմալ դասապրոցեսը. ամեն ինչ կախված է վերանորոգման աշխատանքների ընթացքից:
Էմմա Չոբանյան
