Ֆիզիկական անձանց կողմից մեքենայի մաքսազերծումը շատ է թանկացել. ՊԵԿ փոխնախագահը՝ դրույքաչափերի մասին. ՏԵՍԱՆՅՈՒԹ

Անցյալ տարվա դեկտեմբերի վերջին Գյումրիի մաքսատանն օրական կտրվածքով մոտ 2.000 մեքենա է մաքսազերծվել: Այսօր հրավիրված ասուլիսում այս մասին ասաց ՊԵԿ նախագահի տեղակալ Շուշանիկ Ներսիսյանը:

«Դեկտեմբերի վերջին մենք արդեն անցել էինք 24-ժամյա ծառայության՝ վարչապետի ուղիղ հանձնարարականի արդյունքում: Շատ ծանր էր: Առիթից օգտվելով՝ շնորհակալություն հայտնեմ այնտեղի բոլոր ծառայողներին, ովքեր մինչև դեկտեմբերի 31-ը ժամը 10-ը՝ մինչև վերջին քաղաքացին դուրս չի եկել Գյումրիից, մաքսային ծառայողները չեն ավարտել իրենց աշխատանքը»,- ասաց նա:

Անդրադառնալով մաքսային նոր դրույքաչափերով ավտոմեքենաների մաքսազերծման խնդրին՝ ՊԵԿ փոխնախագահը հիշեցրեց, որ Հայաստանը ԵՏՄ պայմանագրով ստանձնած պարտավորություններ ունի և չի կարող միանձնյա որոշել՝ կուտակված ավտոմեքենաները հին դրույքաչափով մաքսազերծել:

«Բազում հանդիպումներ ենք ունեցել քաղաքացիների հետ: Քաղաքացիների պատկերացումները մի քիչ թյուր են սրա հետ կապված, որովհետև շատերը մտածում են, որ Կառավարությունը կարող է միանձնյա որևէ որոշում կայացնել, որ այս քանակը, օրինակ՝ հազար մեքենա կուտակված է, թույլ տանք՝ հին դրույքաչափերով մաքսազերծել: Եթե նման հնարավորություն ընձեռվի, այդ որոշումը պետք է կայացվի ԵՏՄ անդամ մնացած 4 երկրների կողմից»,- նշեց Շուշանիկ Ներսիսյանը:

Ինչ վերաբերում է նոր դրույքաչափերին, ՊԵԿ փոխնախագահի խոսքով՝ ֆիզիկական անձանց կողմից ավտոմեքենայի մաքսազերծումը շատ է թանկացել. «Չեմ կարծում, որ ինչ-որ մեկին ձեռք տա 3 տարուց հին ավտոմեքենա ներմուծել նոր դրույքաչափերով: Կազմակերպությունների պարագայում թանկացում էլի կա, բայց ընդունելի է: Փորձում ենք գտնել որոշ ճանապարհներ, թե կոնկրետ որ թվականի ավտոմեքենաները ձեռք կտա ներմուծել և մաքսազերծել նոր դրույքաչափերով»:

Մանրամասները՝ տեսանյութում: