13.06.2026 | 19:10
Փաշինյանը հրավիրում է աշխարհի առաջատար համալսարանների շրջանավարտներին՝ միանալ ՀՀ կառավարության կադրային բանկին
Հրդեհից տուժածներին 60,000 դրամ գումար է բաժանվել, կացարանների հարցն առայժմ լուծված չէ
Հասարակություն
24.10.2017 | 19:24
Արմավիրի հրդեհից տուժած բնակիչները երեկ գիշերը կրկին բաց երկնքի տակ են անցկացրել։ Այսօր առավոտյան նրանց այցելել է Արմավիրի քաղաքապետ Ռուբեն Խլղաթյանը և հարցերի շուտափույթ լուծում է խոստացել։
«11 ընտանիքների, թվով 241 անձի բաժանել ենք միանվագ օգնություն՝ 60 հազարական դրամի չափով, որ իրենք իրենց համար սնունդ և առաջին անհրաժեշտության իրեր գնեն, քանի որ նրանց ողջ ունեցվածքն այրվել է, – factor.am-ին հայտնեց Արմավիրի քաղաքապետ Ռուբեն Խլղաթյանը:- Այժմ մենք անշարժ գույքի գործակալների հետ բնակարաններ ենք փնտրում մարդկանց համար, որտեղ նրանք կկարողանան բնակվել 6 ամիս։ Կառավարությունը նրանց բնակվարձի ծախսն իր վրա է վերցրել»։
Տուժածներից Անուշ Բաղդասարյանը մեզ հայտնեց, որ քաղաքապետը իրենց որպես ժամանակավոր կացարան առաջարկել է Արմավիրի սպորտդպրոցի շենքը։
«Խոստացավ, որ կջեռուցի, բայց մենք չհամաձայնվեցինք։ Այստեղ ծեր կանայք կան, չեն ուզում գնալ տարածքից։ Քաղաքապետն ասեց, որ վրանի հարց կլուծի», – պատմեց նա։
Հիշեցնենք, որ Սիլիկյան 23 հասցեում գտնվող երկհարկանի շենքը հրկիզվել էր հոկտեմբերի 22-ի գիշերը։ Կրակը բռնկվել էր ցախարանում, որտեղ վառելափայտ կար։ Ապա պայթել էր տներից մեկում տեղադրված գազի բալոնը, որից հետո հրդեհը տարածվել էր շենքով մեկ։ 4-րդ կարգի վթարայնության այս շենքը առաջ էլ պիտանի չէր շահագործման համար։ Պատերը ճաքած էին, էլեկտրական լարերը դուրս էին եկած պատերից և առաստաղից, փայտե մասերը փտած և ծռմռված էին։ Բնակիչները բազմիցս ահազանգել են իշխանություններին, որ այստեղ ցանկացած պահի կարող է աղետ լինել։ Ի պատասխան՝ նրանց ասել են՝ «ինչքան կարպեք՝ կապրեք»:
Հրդեհին բաժին դարձած շենքի կողքի շենքը նույնպես վթարային է։ Տեսնելով հարևանների վիճակը՝ այս շենքի բնակիչներն իրենց անվտանգ չեն զգում։ Հրդեհից հետո նրանք երկար ժամանակ վախենում էին տները մտնել։
Սյուզան Սիմոնյան
