Ինչո՞ւ է ընդդիմությունը նեղացած կեցվածք ընդունում․ բացահայտում է ԲՀԿ-ական Սերգեյ Բագրատյանը

Ըստ ԱԺ մոնիթորինգի՝ ընդդիմադիր խմբակցությունների 21 օրենսդրական նախաձեռնություն երրորդ նստաշջանում քվեարկությամբ մերժվել է և չի ընդգրկվել նստաշրջանի օրակարգ։ Նախորդ նստաշրջանում այդ թիվը 16 էր։ Ընդդիմության նախագծերից 7 նախաձեռնություն մերժվել է քննարկումից հետո։ Սրան հակառակ՝ գրեթե 4 անգամ ավելացել է ընդդիմադիր խմբակցությունների հեղինակած և ընդունված օրինագծերի թիվը, 23՝ նախորդ նստաշրջանի 6-ի փոխարեն։

«Բարգավաճ Հայաստան» խմբակցության անդամ Սերգեյ Բագրատյանը նշում է, որ ինքը համահեղինակել կամ հեղինակել է 14 նախագիծ, որից ընդունվել է 5-ը, 7-ը ընթացքի մեջ է, դրանց ճակատագիրը հայտնի չէ:

«Իշխանությունը խնդիր է ունենում, երբ ուզում է նախագիծը մերժել, ու դու հարցնում ես՝ ինչու։ Իշխանական խմբակցության մերժումները քիչ են, որովհետև կառավարությունը աջակցում է և միմյանց օգնում են, հաճախ՝ հուշումներ են լինում։ Բայց որ ակտիվ է ընդդիմությունը աշխատում, դա նրա շնորհիվ է, որ այս պառլամենտում ի տարբերություն նախորդի, ընդդիմադիրների նկատմամբ ըմբռնումն ավելի մեծ է։ Երբեմն չբավարարող բաներ կան, երբ մենք նախագիծ ենք մշակում, տեսնում ենք՝ նույնը սկսել է նաև իշխանությունը»,- ասաց ընդդիմադիր պատգամավորը։

Նա ասաց, որ ընդդիմությունը երբեմն նեղացած կեցվածք է ընդունում այն դեպքում, երբ իրենք և իշխանական խմբակցությունը առաջարկում են նույն նախագիծը, սակայն ընդունվում է իշխանության գաղափարը:

«Հիմա առաջարկում եմ երեք ամսում լուծել քաղաքացիության խնդիրը, իրենք մերժել են, թե՝ ոչ՝ եկեք 90 օր ժամկետ սահմանենք։ Այսպիսի լուրջ հարցեր առաջանում են, որից ընդդիմությունը կարող է նեղացած կեցվածք ընդունել»,- ասաց Բագրատյանը։

Մանրամասները՝ տեսանյութում:

Ռոբերտ Անանյան