Հանրաքվեն չի կարող արտահայտել ժողովրդի կամքը, քանի որ ատելության մթնոլորտ կա. Վարդան Այվազյան. ՏԵՍԱՆՅՈՒԹ

«Ստեղծվել է խորը սահմանադրական ճգնաժամ, որը հանգեցրել է նաև քաղաքական ճգնաժամի։ Նախկինում նենգափոխվել է Սահմանադրությունը։ Սեփական գործառույթներին չտիրապետող իշխանության և ՍԴ-ի հակամարտությունը վերածվել է միջանձնային հակամարտության, ինչը չի կարող դրական լինել պետության համար»,- կարծիք է հայտնում սահմանադրագետ Վարդան Այվազյանը։

Նրա գնահատմամբ՝ խնդիրը պետք է հանգուցալուծվի ինստիտուցիոնալ մեթոդներով, իսկ ըստ նրա՝ հանրաքվե անցկացնելու գաղափարը հակասահմանադրական է: «Օրենքը հստակ սահմանում է, որ սահմանադրական փոփոխություն կատարելու համար նախագիծը պետք է ուղարկվի նաև Սահմանադրական դատարան՝ եզրակացության համար։ Առաջին ընթերցմամբ չընդունվելու պարագայում նախագիծը պետք է դուրս գա շրջանառությունից»,- ասում է սահմանադրագետը։

Անդրադառնալով անցկացվելիք հանրաքվեին՝ Այվազյանն ասում է, որ ատելության մթնոլորտում անցկացվող հանրաքվեն չի կարող արտահայտել ժողովրդի կամքը․ «Չի բացառվում բախումները, հակամարտությունը։ Հանրաքվեն չի կարող արտահայտել ժողովրդի կամքը, քանի որ անցկացվում է ատելության մթնոլորտի պայմաններում»։

Ճգնաժամը հանգուցալուծելու գործում սահմանադրագետը կարևորում է նախագահի դերը, որը, նրա կարծիքով, ակտիվ չէ, պետք է ձևավորեր սահմանադրական ասամբլեա՝ լայն փորձագիտական կազմով, որը ինստիտուցիոնալ ձևով կլուծեր սահմանադրական թնջուկը։

«Եթե ուզում ենք ազատվել ՍԴ ադամներից, դա հնարավոր չէ անել Սահմանադրության խախտմամբ։ Այդ նախադեպը հաջորդ իշխանությունն օգտագործելու է և կրկին խախտի Սահմանադրությունը։ Սեղանին ֆունդամենտալ հիմնավորումներ դրված չեն, միայն՝ էմոցիաներ»,- եզրափակեց Այվազյանը։

Մանրամասները՝ տեսանյութում:

Ռոբերտ Անանյան