Արթուր Վանեցյանն ամեն ինչ արել է, որ Միհրան Պողոսյանին քաղբանտարկյալ դարձնի․ ՏԵՍԱՆՅՈՒԹ

Factor.am-ի հարցազրույցը Հանրային խորհրդի նախագահ Ստյոպա Սաֆարյանի հետ

– Այսօր ԱԺ-ն արտահերթ նիստում կողմ քվեարկեց ՍԴ նախագահի և անդամների լիազորությունների դադարեցման վերաբերյալ Սահմանադրությունում փոփոխություն կատարելու հարցը հանրաքվեի դնելու վերաբերյալ նախագիծը: Ձեր գնահատմամբ՝ արդյո՞ք Հրայր Թովմասյանի և ՍԴ-ի շուրջ տեղի ունեցող իրավիճակը պետք է հանգուցալուծվի հանրաքվեով:

– Ես դեռևս նախկինում և այժմ էլ կարծել ու կարծում եմ, որ Սահմանադրական դատարանի խնդիրը պետք է լուծվի: Ըստ որում, ուզում եմ անպայման ընդգծել, որ սա իմ անձնական կարծիքն է, հանկարծ չհամարեք Հանրային խորհրդի կարծիք: Ես կարծում եմ, որ ոչ միայն այն փաստով, որ Հայաստանում տեղի ունեցած թավշյա հեղափոխությունը սահմանադրական կարգը վերականգնեց օրենսդիր ու գործադիր իշխանության և սահմանադրական կարգի այլ հիմնարար իրավունքների և սկզբունքների վերականգնման տեսքով՝ ի դեմս անցկացված օրինական ընտրությունների, լեգիտիմ կառավարման ձևավորման, այլ դա չի կարող ուղղակի կանգ առնել դատական իշխանության վրա: Եվ դատական իշխանությունը մնա հինը, և մենք ապրենք երկու իրականությունների միջև՝ նոր Հայաստան, որը հռչակել է հեղափոխությունը, որին ամբողջ հասարակությունը հավատացել է այդ տեսլականի համար, անցյալի մերժման համար դուրս է եկել փողոց, իր գնահատականն է տվել նախկին իշխանություններին, իշխանության և պետության բռնազավթմանը…

– Հիմա սա լավագույն տարբերա՞կն է:

– Ես կարծում եմ, որ այն ճանապարհը, որը որդեգրեց իշխանությունը, թերևս, այդ ճանապարհի հերթական հանգրվանն է: Իմ պատկերացրած ճանապարհն ամենևին դա չի եղել: Ես չեմ թաքցրել, որ ամենաառաջին քայլը, որ պիտի արվեր հեղափոխությունից հետո, դա քաղաքական գնատականի հարցն է: Թեպետ հիմա էլ կարող է արվել: Այս մասին շատ ենք խոսել, և եթե տրվեր գնահատական պետության զավթման վերաբերյալ, իսկ Սահմանադրական դատարանը պետության զավթման դասական օրինակ է, թե ինչպես կարող են ԽԾԲ-ներով Հրայր Թովմասյանին ժամանակից շուտ ՍԴ անդամ նշանակելով, Գագիկ Հարությունյանին պաշտոնից ազատելով և նրա համար այլ պաշտոն ստեղծելով, Հրայր Թովմասյանին այնպես ՍԴ տանելով, որ հանկարծ ՍԴ-ն իր կազմից չընտրի և այլն, սա զավթման դասական օրինակ է:

– Վարչապետն այսօր ասաց, որ խոսել է նախագահ Արմեն Սարգսյանի հետ, նախագահը ևս կողմ է եղել հարցը հանրաքվեով հանգուցալուծելու տարբերակին: Նիկոլ Փաշինյանը ներկայացրեց նաև հիմնավորումը, թե ինչու պետք է ՍԴ ներկա կազմը հեռանա: Ըստ նրա՝ եթե ՍԴ-ն ներկա Սահմանադրությամբ կազմավորվի, իշխանության երեք ճյուղերը՝ նախագահի ինստիտուտ, կառավարություն և դատական մարմիններ, ունեն ՍԴ ձևավորելու հնարավորություն, և այդպիսով կհակակշռվի, յուրաքանչյուրը երեք թեկնածու կներկայացնի և բոլորը ներկայացված կլինեն: Բացի այդ, ըստ նրա, ՍԴ նախագահն ավելի պակաս հնարավորություն ունի, նոր Սահմանադրությամբ ընտրվելու դեպքում, իշխել կամ ղեկավարել ամբողջ ՍԴ-ն: Նա կարծում է, որ հանրաքվեով պետք է լուծել հարցը: Նման տեսլականն ինչպե՞ս եք գնահատում: Համոզո՞ւմ են այս հիմնավորումները:

– Նորից եմ կրկնում, քանի որ այս իշխանությունն ինքն է որոշել գնալ այս ճանապարհով և հանգուցալուծումը տեսնում է սահմանադրական հանրաքվեն, դրանում խնդիր չեմ տեսնում: Մանավանդ՝ իրավական բնույթի որևէ խնդիր չկա, Սահմանադրությունը թույլ է տալիս սահմանադրական փոփոխություն անել հանրաքվեի եղանակով: Թերևս, դա ավելի հիմնավոր որոշում կլինի, քան ԱԺ-ի կողմից կայացված որոշումները:

– Այսօր ընդդիմադիրներն այլ բան էին ասում…

– Որովհետև, այո՛, երբ երեկ ներկայացրեցին օրենսդրական փաթեթը, սկզբնական շրջանում փորձ էր արվում ԱԺ-ում կատարել փոփոխությունները և ընդամենը ԱԺ-ով ստանձնել այդ պատասխանատվությունը: Քաղաքական պատասխանատվության տեսանկյունից, այո՛, ճիշտ է, շատ ավելի հիմնավոր կլինի, եթե այս որոշման պատասխանատվությունը կրենք բոլորս՝ իշխող քաղաքական ուժից սկսած մինչև հասարակությունը:

– Կարծում եք՝ քաղաքական կոնյուկտուրային տուրք տալով չէ՞, որ նախագահ Արմեն Սարգսյանը պատրաստվում է ստորագրել որոշումը:

– Ո՛չ: Ի վերջո, հեղափոխությունն էլ ցույց տվեց, այնուամենայնիվ, նախադեպ է ստեղծվել, երբ ՀՀ յուրաքանչյուր բարձրաստիճան պաշտոնյա պիտի մտածի՝ ապագայում ինքը որտեղ է հայտնվելու, եթե դեմ գնա ժողովրդի սահմանադրական իրավունքներին, եթե դեմ գնա Սահմանադրությանը կամ որևէ այլ օրինական պահանջի և կատարի իշխանության բարձրագույն կամքը: Հրայր Թովմասյանը հենց այդ կարգի զոհն է իրականում: Դուք հարցնում եք՝ լավ տարբերակ է, թե վատ: Դա խայտառակություն է: ՍԴ 7 անդամներ կառչել են իրենց պաշտոններից, և հիմա ամբողջ ազգը պիտի հավաքվի, որպեսզի իրենց տուն ճանապարհի: Սա իրենց խայտառակությունն է: Սա ամոթալի է, բայց ամոթալի չէ ո՛չ հեղափոխության, ո՛չ հասարակության համար:

– Ի դեպ, Արթուր Վանեցյանը հարց բարձրացրեց՝ ինչպե՞ս ստացվեց, որ Միհրան Պողոսյանը լքեց Հայաստանը, Արթուր Դավթյանը քայլեր չձեռնարկեց, դատախազությունից արձագանքեցին, որ գործը եղել է ԱԱԾ-ում, երբ Պողոսյանը լքել է ՀՀ տարածքը։ Դուք ի՞նչ կարծիք ունեք սրա վերաբերյալ։

– Իմ ուշադրությունը գրավեց այն, որ պարոն Վանեցյանը այս հեռակա երկխոսության մեջ կարևոր բացահայտումներ է անում: Ասում է, որ ինքը դիմել է, որպեսզի Միհրան Պողոսյանի վերաբերյալ գործը վերաբացվի, և դատախազը մտնի Ազգային ժողով՝ անձեռնմխելիությունից զրկելու հարցով: Ես կհավատայի պարոն Վանեցյանի անկեղծությանը, եթե չլիներ մի կարևոր փաստ՝ եթե չլիներ գլխավոր դատախազի տեքստում մի բաց պնդում. խոսքը վերաբերում է նրան, որ, հարգելի՛ պարոն Վանեցյան, այն քրեական գործը, որը քննվել է Ձեզ մոտ, այդ քրեական գործում չեն եղել այն հանգամանքները, որոնց վերաբերյալ Ձեր նամակում տեղյակ եք պահել մեզ: Պատկերացրեք՝ Արթուր Վանեցյանը Միհրան Պողոսյանի վերաբերյալ քննված գործն ուղարկում է դատախազություն, որից հետո հանկարծ այս գործին չվերաբերող այլ հանգամանքներով Արթուր Վանեցյանը, չգիտես ինչու, ոչ պրոֆեսիոնալ վարքագիծ է ցուցաբերում: Իմ կարծիքով՝ Արթուր Վանեցյանն ամեն ինչ արել է, որ Միհրան Պողոսյանին քաղբանտարկյալ դարձնի:

Հարցազրույցն ամբողջությամբ՝ տեսանյութում:

Ռոբերտ Անանյան