«Նույն զորամասից մի քանի ամիս առաջ Առաքել Մովսիսյանի որդու վերաբերյալ ստացել ենք ահազանգ»․ՊՆ գնդապետ. ՏԵՍԱՆՅՈՒԹ

ՀՀ Պաշտպանության նախարարության մարդու իրավունքների և բարեվարքության կենտրոնի պետ, գնդապետ Ալեքսանդր Ավետիսյանը Factor.am-ի զրույցում պատասխանելով հարցին, որ եթե հունվարի 30-ին Արցախում մահացած ժամկետային զինծառայող Վահրամ Ավագյանի հարազատները նրա դագաղը մայրուղիով չբերեին Երևան, արդյոք պաշտպանության նախարարը կհանդիպե՞ր նրանց հետ ու կասե՞ր, որ դա իր համար ինքնասպանություն չէ, ասաց, որ չի կարող պնդել, թե այդ կոնկրետ գործողությունն ինչ-որ բեկման հիմք հանդիսացավ։

«Կոնկրետ պաշտպանության նախարարի և այլ պաշտոնատար անձանց այնտեղ լինելը պայմանավորված էր առավելապես բարոյական պարտքով։ Այս պարագայում խոսքը վերաբերում էր բարոյական պարտքին։ Չեմ կարող պնդել, որ արարքի որակման վրա ազդեցություն կարող է գործել։ Նախարարն այս պահին չի կարող արարքին որակում տալ, ոչ մի առնչություն չունի քննության հետ։ Նշված քննարկումը ծավալվել է բարոյահոգեբանական, միջանձնային տիրությում»,- ասաց Ալեքսանդր Ավետիսյանը։

Մեր հարցին, թե մահացած զինվորի ծնողներին ուղղված՝ «Դա ինձ համար ինքնասպանություն չէ» արտահայտությունը տեղում հանգստացնելու համա՞ր էր, ՊՆ ներկայացուցիչն ասաց, որ դա, միգուցե, ոչ միայն հանգստացնելու, այլև ալեգորիկ խոսք էր։ Իսկ ինքն այս պահին ոչ մեկին ոչ մի բանով չի մեղադրում՝ մինչև նախաքննության ավարտը։

Նշենք, որ չնայած տարին դեռ նոր է սկսվել, բայց Հայոց բանակում արդեն կա ոչ մարտական 4 մահվան և 9 վիրավորման դեպք, ընդ որում՝ 2-ը որակվել են որպես ինքնասպանություն։ Ոչ մարտական դեպքերի մեծ մասը տեղի է ունեցել Արցախի զորամասերում։ Հարցին՝ սա նշանակո՞ւմ է, որ ՀՀ ՊՆ-ն լիովին չի տիրապետում Արցախի զորամասերում տիրող իրավիճակին, Ավետիսյանը չհամաձայնեց. «Կա բավականին արդյունավետ հետադարձ կապ։ Այն խնդիրները, որոնք առկա են, հասանելի են նաև մեզ, և մենք աշխատում ենք շատ ինտենսիվ: Այն ամենը, ինչ կարելի է անել համատեղ ուժերով, անում ենք»։

Նրա խոսքով՝ իրենց կենտրոնն անցյալ տարի 47 հազար ահազանգ է ստացել զինծառայողներից ու նրանց ընտանիքներից. «Այդ առումով բազմաթիվ վարույթներ են հարուցվել, անգամ նյութեր են նախապատրաստվել»։

Ալեքսանդր Ավետիսյանն ասաց, որ մեր զինծառայողների մոտ դեռևս առկա է տղայականություն, որ խնդիրների մասին պետք չէ զեկուցել կամ խոսել։ «Զինվորների մոտ պետք է լինի խնդիրները բարձրաձայնելու պատասխանատվություն և համարձակություն»,- ասաց նա։

«Նույն զորամասից մի քանի ամիս առաջ Առաքել Մովսիսյանի որդու վերաբերյալ ստացել ենք ահազանգ, ձեռնարկել ենք համապատասխան քայլեր։ Թեժ գիծ էր զանգել կոնկրետ զինծառայողի ընտանիքի անդամ՝ մորաքույր, նշել էր, որ այնտեղ ինչ-որ ճնշումներ կան։ Ճնշումների հիման վրա անմիջապես կապ ենք հաստատել ռազմական ոստիկանության հետ, նախարարը գրություն է ուղարկել Արցախի ՊՆ»,- պատմեց Ավետիսյանը։

Դիտարկմանը, թե դա, փաստորեն, առանձնապես չի ազդել Առաքել Մովսիսյանի որդու վարքի վրա, ՊՆ ներկայացուցիչը պատասխանեց, թե այդ առիթով հայտարարություն է տարածել Արցախի ՊՆ-ն, և պետք է իրենց դիմել։

Հարցազրույցն ամբողջությամբ՝ տեսանյութում։

Մարինե Խառատյան