Տնտեսություն
04.02.2020 | 11:24
2020-ի փետրվարի 4-ից ուժի մեջ կմտնեն Եվրասիական տնտեսական միության մաքսային սահմանով դրամական միջոցների և այլ դրամական գործիքների փոխադրման նոր կանոնները:
ԵՏՄ մաքսային սահմանով 100 հազար ԱՄՆ դոլարից ավելի միջոցներ ներմուծելիս և արտահանելիս, քաղաքացիները պարտավոր են տրամադրել դրանց ծագումը հաստատող փաստաթղթեր։ Այս մասին հայտնում է Ռուսարմինֆո-ն՝ հղում տալով Դաշնային մաքսային ծառայության մամուլի ծառայությանը:
«Որպես այդպիսին կարող են ներկայացվել վարկային կազմակերպությունների կողմից կազմված փաստաթղթերը, հաշվեհամարից միջոցների դուրսբերման կամ վարկի ձևակերպման փաստաթղթերը, ինչպես նաև Քաղաքացիական օրենսդրության գործարքների (ժառանգություն, նվիրատվություն և այլն) կնքումը հաստատող փաստաթղթերը»,- ասված է ծառայության տարածած հաղորդագրությունում:
Նշվում է, որ այս կանոններն ուղղված են այն միջոցների միջսահմանային տեղաշարժի հայտնաբերմանը և դադարեցմանը, որոնք կարող են օգտագործվել ահաբեկչության ֆինանսավորման կամ հանցագործության ճանապարհով ձեռք բերված հասույթի օրինականացման համար:
Հիշեցնենք, որ ԵՏՄ մաքսային գոտին ներառում է Ռուսաստանը, Հայաստանը, Բելառուսը, Ղազախստանը և Ղրղզստանը:
