22.05.2026 | 10:51
Սևան-Ծափաթաղ ճանապարհին 22-ամյա կինը մեքենայից դուրս է նետվել և մահացել․ 21-ամյա վարորդը ձերբակալվել է
Վենետիկի հանձնաժողովի նախագահը մտահոգ է Սահմանադրական դատարանի շուրջ ստեղծված իրավիճակով
Քաղաքականություն
03.02.2020 | 19:38
2019-ի հոկտեմբերի 29-ի իմ հայտարարությունից հետո շարունակում եմ մտահոգված լինել Հայաստանի Սահմանադրական դատարանի հետ կապված բաց կոնֆլիկտով: Այդ առումով կիսում եմ ԵԽԽՎ համազեկուցողների մտահոգությունները: Այս մասին հայտարարել է Վենետիկի հանձնաժողովի նախագահ Ջիանի Բուքիքիոն։
«Ուզում եմ հիշեցնել 2019 թվականին Վենետիկի հանձնաժողովի կողմից ընդունված հանձնարարականները, համաձայն որոնց՝ Սահմանադրական դատարանում վաղ կենսաթոշակի անցնելու ցանկացած սխեմա պետք է իսկապես լինի կամավոր, բացառի որևէ անպատեհ քաղաքական կամ անձնական ճնշում դատավորների վրա, և պետք է այնպես մշակվի, որ չազդի ընթացիկ գործերի արդյունքների վրա։ Վերջին հանրային հայտարարությունները և գործողությունները չեն համապատասխանում այս չափանիշներին և չեն նպաստելու իրավիճակի հանգուցալուծմանը: Ժողովրդավարական մշակույթը և հասունությունը պահանջում են, որ պետական ինստիտուտներն ինստիտուցիոնալ զսպվածություն, բարի կամք և փոխադարձ հարգանք դրսևորեն: Կողմերին ևս մեկ անգամ կոչ եմ անում զսպվածություն ցուցաբերել և հանգուցալուծել այս անհանգստացնող իրավիճակը՝ երաշխավորելու համար Հայաստանի Սահմանադրության բնականոն գործունեությունը»,- հայտարարել է Բուքիքիոն։
Հիշեցնենք, որ հունվարի 31-ին ԵԽԽՎ մոնիթորինգի հանձնաժողովի համազեկուցողները հայտարարություն էին տարածել, որտեղ անհանգստություն էին հայտնում Հայաստանի երկու պետական ինստիտուտների ՝ Վարչապետի գրասենյակի և Սահմանադրական դատարանի նախագահության միջև լարվածության բարձր մակարդակից:
Հիշեցնենք նաև, որ Վենետիկի հանձնաժողովում ՀՀ մշտական ներկայացուցիչը ՍԴ նախկին նախագահ Գագիկ Հարությունյանն է: Արա Խզմալյանն ու սահմանադրագետ Վարդան Պողոսյանը փոխարինող անդամներն են:
Նելլի Մելքոնյան
