«Գաղութն էլ է մեր համար». Վարդան Ղուկասյան

Գյումրու նախկին քաղաքապետ, ԱԺ պատգամավոր Վարդան Ղուկասյանը շուտով հրավիրվելու է հարցաքննության: Այս մասին հայտնել է ՇՄ դատախազ Կարեն Գաբրիելյանը:

Դատախազությունն ուսումնասիրում է Վարդան Ղուկասյանի կողմից Գյումրու կենտրոնական այգու որոշ տարածքների և շինությունների ապօրինի օտարման հարցը: Խոսքը նաև Ղուկասյանների ընտանիքին պատկանող «Օազիս» սրճարանի մասին է։

Շիրակի դատախազը նաև նշել է, որ Վարդան Ղուկասյանի՝ քաղաքապետ եղած տարիներին օտարվել են «Հոկտեմբեր» կինոթատրոնի շենքը, «Տրոլեյբուսային պարկը», «Մայիսյանի» և այլ կաթսայատներ: Սա ևս ուսումնասիրում է Դատախազությունը:

Թեմայի շուրջ Factor.am-ը զրուցել է Վարդան Ղուկասյանի հետ:

-Պարոն Ղուկասյան, Շիրակի գլխավոր դատախազն այսօր հայտարարել է, որ Ձեզ հրավիրելու են հարցաքննության: Նշվում է, որ Դուք քաղաքապետ եղած ժամանակ անօրինական օտարել եք կենտրոնական զբոսայգու որոշ տարածքներ:

-Բա որ Գյումրու կենտրոնական զբոսայգում անօրինական բան է եղել, ո՞նց են վկայական տվել: Այս հանրապետության բոլոր ղեկավարներն այդտեղ եղել են, առաջին ներդրումն է եղել այս քաղաքում, դենդրոպարկ է կառուցվել: Այդ այգին երկրաշարժից հետո մենք պահել ենք: Էս նոր են ծլե՞լ:

-Բայց Դուք՝ Ձեր ընտանիքը, բիզնես եք արել, շահույթ եք հետապնդել, որ ասում եք, թե պահել եք․․․

– Լավ ենք արել, բիզնես անելը հանցագործությու՞ն է: Աշխատատեղեր ենք բացել, մարդիկ կարողացել են աշխատել, ուրիշ տեղ չենք տարել մեր ունեցվածքը դրել: Տանջանքով, չարչարանքով բան ենք արել, վա՞տ ենք արել: Մեռած քաղաքը ոտքի ենք հանել, ինչո՞ւ հիմա նոր խառնվեցին իրար: Սա քաղաքական պատվեր է: Թող գան այդ կառույցը (նկատի ունի իրենց ընտանիքին պատկանող «Օազիս» սրճարանը) իրենց տանք: Խլոցի է սկսվե՞լ:

-Վստա՞հ եք, որ  այս գործընթացի արդյունքում չեք հայտնվի անազատության մեջ։

-Գաղութն էլ է մեր համար: Ինչու գաղութում մարդիկ չե՞ն ապրում, հո բոլորը հանցագործ չեն: Ավետիք Իսահակյանն էլ է կալանավորվել, Հովհաննես Թումանյանն էլ, Եղիշե Չարենցն էլ:

-Որ ասում եք՝ գաղութն էլ է մեր համար, նկատի ունենք, որ անազատության մեջ գտնվողների շրջանում ծանոթներ ունե՞ք:

-Իրենք ավելի շատ ծանոթներ ունեն: Թող պատվեր չկատարեն: Ամեն ինչ կանցնի, կամուրջները թող չայրեն: Վերջում ինձ աշխատանքային հերոսի կոչում են տալու՝ քաղաքը կառուցելու համար:

-Դուք ասում եք, որ քաղաք եք կառուցել, բայց Դատախազությունն ուսումնասիրում է Ձեր քաղաքապետության շրջանում «Հոկտեմբեր» կինոթատրոնի, Գյումրու նախկին «Տրոլեյբուսային պարկ»-ի, «Մայիսյանի» և այլ կաթսայատների օտարումները:

-Տրոլեյբուսային պարկը սնանկ է ճանաչվել և դատարանի կողմից վաճառվել է: Ինչ մնում է կինո «Հոկտեմբերին»,  դրա բոլոր բացատրությունները կան՝ հատիկ-հատիկ:

-Եթե իրավապահ մարմինները հրավիրվեն, կներկայանա՞ք բացատրության կամ հարցաքննության:

-Եթե օրենքը ցույց է տալիս, որ ԱԺ պատգամավորին հրավիրեն, ես կգնամ, եթե թույլ չտա՝ չեմ գնա: Ես փախնելու բան չունեմ:

Նարեկ Կիրակոսյան