19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Արտասահմանյան հեռուստաալիքների վերահեռարձակման մասին Տիգրան Հակոբյանի հայտարարությունը տարակուսանք է առաջացրել ՌԴ դեսպանության մոտ
31.01.2020 | 15:12
Հայաստանի ղեկավարության՝ հայ-ռուսական դաշնակցային, եղբայրական հարաբերությունների մասին հայտարարությունների ֆոնին «ռուսական ալիքների վերահեռարձակմումը ՀՀ ազգային անվտանգությանը սպառնալիք հանդիսանալու մասին թեզը» տարակուսանք է առաջացնում: Այս մասին ասված է ՀՌՀ նախագահ Տիգրան Հակոբյանի՝ հանրային մուլտիպլեքսում արտասահմանյան հեռուստաալիքների վերահեռարձակման մասին հայտարարությանն ի պատասխան Հայաստանում ՌԴ դեսպանության տարածած հաղորդագրությունում:
«Ուշադրություն դարձրեցինք ՀՌՀ նախագահ Տիգրան Հակոբյանի դիրքորոշմանն այն մասին, որ հանրային մուլտիպլեքսում արտասահմանյան հեռուստաալիքների վերահեռարձակումը, որոնց թվում են նաև ռուսականները, սպառնալիք է Հայաստանի ազգային անվտանգությանը։ Տիգրան Հակոբյանի մեկնաբանությունից զարմանքով տեղեկացանք, որ Հայաստանում ՌԴ դեսպանը համաձայն է այս մոտեցմանը:
Կցանկանայինք հիշեցնել, որ ՌԴ դեսպանի հետ միակ, այն էլ՝ բավական վաղուց կայացած հանդիպման ժամանակ Տիգրան Հակոբյանի հնչեցրած՝ առանց արտասահմանյան հեռուստաալիքների «նվազագույն սոցիալական փաթեթ» ստեղծելու մտադրությունն ընդամենն ընդունվել է ի գիտություն։ Ընդ որում, դիվանագիտության առաքելության ղեկավարն ընդգծել է, որ անհրաժեշտ է հաշվի առնել ՀՀ բազմաթիվ քաղաքացիների շահերը, որոնք ռուսական ալիքների մշտական լսարանն են:
Ընդհանուր առմամբ, Հայաստանի ղեկավարության՝ հայ-ռուսական դաշնակցային, եղբայրական հարաբերությունների մասին հայտարարությունների ֆոնին «ռուսական ալիքների վերահեռարձակումը ՀՀ ազգային անվտանգությանը սպառնալիք հանդիսանալու մասին թեզը» տարակուսանք է առաջացնում»,- ասվում է ՌԴ դեսպանության հայտարարությունում:
Հիշեցնենք, որ ՀՌՀ նախագահ Տիգրան Հակոբյանը հունվարի 29-ին լրագրողների հետ զրույցում ասել էր, որ Հայաստանի հանրային թվային մուլտիպլեքսում, որը ՀՀ քաղաքացիներին անվճար դիտումներ է ապահովում, օտար հեռարձակողներ չպետք է լինեն։
