Քաղաքականություն
30.01.2020 | 12:51
Չինաստանում նոր կորոնավիրուսի հետևանքով զոհերի թիվը հասել է 170-ի, վարակվածներինը՝ 7711-ի: ՌԻԱ Նովոստիի փոխանցմամբ՝ այս հայտնել է Չինաստանի առողջապահության հարցերի պետական կոմիտեն:
Մեկ օր առաջ հայտնի էր դարձել 132 զոհի և 5974 հիվանդի մասին: Առաջին դեպքը գրանցվել է նաև Տիբեթում, որը երկրի վերջին «մաքուր» շրջանն էր:
Մեկ օրվա ընթացքում իշխանությունները 38 նոր մահվան դեպք են գրանցել. 37-ը՝ Հուբեյում, մեկը՝ Սիչուանում: Միաժամանակ, այս ընթացքում 124 մարդ դուրս է գրվել հիվանդանոցներից:
Դեկտեմբերի վերջին, հիշեցնենք, Չինաստանի իշխանությունները հաղորդեցին Հուբեյ նահանգի Ուհան քաղաքում անհայտ ծագման թոքաբորբի բռնկման մասին: Կարճ ժամանակ անց մասնագետները տեղեկացրեցին, որ հիվանդության հարուցիչը նոր տիպի՝ 2019-nCoV կորոնավիրուսն է:
Չինաստանից բացի՝ նոր կորոնավիրուսով վարակի դեպքեր են գրանցվել Հարավային Կորեայում, Ճապոնիայում, ԱՄՆ-ում, Թայլանդում, Վիետնամում, Կանադայում, Սինգապուրում, Նեպալում, Ֆրանսիայում, Ավստրալիայում, Մալազիայում, Կամբոջայում և Գերմանիայում:
