Անվասայլակներով մարաթոնը՝ հավասար հնարավորությունների իրավունքի ուղերձ

Այսօր վաղ առավոտյան Երևանի կենտրոնից՝ Ֆրանսիայի հրապարակից մեկնարկեց Երևան-Էջմիածին անվասայլակներով երթ-մարաթոնը, որին մասնակցում էին հարյուրից ավելի հաշմանդամություն ունեցող անձինք և կամավորներ:

Միջոցառումն իրականցվեց Եվրամիության աջակցությամբ, ՀՀ Կառավարության և «Փյունիկ» միության ջանքերով: ՀՀ-ում Եվրամիության դեսպան Պյոտր Սվիտալսկին կարևորեց նմանատիպ միջացառումները, նշելով, որ դրանք միտված են ցույց տալու՝ բոլորս հավասար ենք և ունենք միևնույն իրավունքները:

Աշխատանքի և սոցիալական հարցերի նախարար Արտեմ Ասատրյանն անդրադառնալով մեր երկրում հաշմանդամություն ունեցող անձանց խնդիրներին՝ հավաստիացրեց՝ Կառավարությունը քայլեր է ձեռնարկում հաշմանդամություն ունեցող անձանց խնդիրները կարգավորելու ուղղությամբ, սակայն դա բարդ և ժամանակատար գործընթաց է:

Factor.am-ի հետ զրույցում հաշմանդամություն ունեցող անձիք դժգոհեցին ազատ տեղաշարժի սահմանափակումներից, մի մասը ուշադրության պակասից, նաև՝ լիարժեք ինտեգրման հնարավորությունների բացակայությունից:

Պաշտոնական տվյլաներով 2016թ. դեկտեմբերի 1-ի դրությամբ ՀՀ-ում հաշվառված է 204.770 հաշմանդամություն ունեցող անձ, որոնցից աշխատանք ունի միայն 8-9-ը տոկոսը: Մեր զրուցակիցներից ոմանք ունեին աշխատանք, սակայն, ինչպես իրենք են փաստում, գործատուները մեծավմասամբ մերժում են սահմանափակ ֆիզիկական հնարավորություններով անձանց աշխատանքի ընդունել:

Նշենք, որ անցած մեկ տարում հաշմանդամություն ունեցող երեխաների թիվն ավելացել է՝ 2016 թվականի տվյալներով կա 8.000 հաշմանդամություն ունեցող երեխա: 2015 թվականին նրանց թիվը 7800 էր:

Լիլիթ Շաբոյան