Օրակարգ կարող են բերվել հարցեր, որոնք մեզ ընդհանրապես հետաքրքիր չեն․ Արման Բաբաջանյանը՝ Համազասպ Դանիելյանին. ՏԵՍԱՆՅՈՒԹ

Ազգային ժողովում քննարկվում է Համազասպ Դանիելյանի և Հերիքնազ Տիգրանյանի կողմից ներկայացված «Հանրաքվեի մասին ՀՀ սահմանադրական օրենքում լրացումներ և փոփոխություններ կատարելու  մասին» օրենքի նախագիծը։

Պատգամավոր Արման Բաբաջանյանը, դիմելով նախագծի հեղինակ Համազասպ Դանիելյանին, հետաքրքրվեց․ «Հավանաբար, պատկերացնում եք, որ ՀՀ քաղաքացիները, որոնք գտնվում են արտերկրում, շատ հանգիստ կարող են այլ երկրների կողմից, Հայաստանում շահեր հետապնդող երկրների կողմից օգտագործվել այսպիսի նախաձեռնությունների համար և շահարկման ներքին տրամադրությունների առարկա դառնալ, հիմք դառնալ։ Այսպիսի հաշվարկ արվե՞լ է։ Գիտեք, որ որոշ պարտիզանական ուժեր հատուկ ատելության քարոզչություն են տանում հայկական սփյուռքի տարբեր համայնքներում և այս առիթը կարող է օգտագործվել, օրինակ՝ տարաբնույթ նախաձեռնությունների տեսքով օրակարգ բերել հարցեր, որոնք այսօր մեզ ընդհանրապես հետաքրքիր և կարևոր չեն։ Այսպիսի հարցերը դիտարկվե՞լ են նախաձեռնությունը հանդես բերելիս»։

«Իմ քայլը» խմբակցության պատգամավոր Համազասպ Դանիելյանը նկատեց, որ խոսքն ԱԺ օրակարգ նախաձեռնություն բերելու մասին է։ «Եթե էլեկտրոնային ստորագրությունների տարածման ճանապարհով գնանք, միգուցե, մենք կարող ենք նորից այստեղ քննարկել և նույն IP հասցեով կամ այլ եղանակով փորձել հավաստիանալ, որ ՀՀ-ի ներսում է եղել։ Իմ կարծիքով՝ սա լրացուցիչ խողովակ է ընդամենը, որը քաղաքացուն ներգրավում է քաղաքական պրոցեսում։ Չեմ կարծում, որ այդպես լուրջ ռիսկեր կան»,- ասաց Դանիելյանը։

Տեղեկացնենք, որ ներկայացված օրինագծով առաջարկվում է կիսով չափ կրճատել քաղաքացիական նախաձեռնության կարգով ԱԺ-ին օրենքի նախագիծ առաջարկելու կամ հանրաքվեի միջոցով ընդունված օրենքում փոփոխություն կատարելու մասին օրենքի նախագիծը հանրաքվեի դնելու համար կազմավորվող նախաձեռնող խմբի անդամների նվազագույն քանակը՝ 50 հազարից իջեցնելով մինչև 25 հազարի:

Մանրամասները՝ տեսանյութում։