Պետական հեղաշրջման հարցն օրակարգ է բերվել, քանի որ ուրիշ թեմա չկար խոսելու. Ալեն Սիմոնյան. ՏԵՍԱՆՅՈՒԹ

Ես դրան չեմ վերաբերվում որևիցե կերպ: Այս մասին Factor.am-ի հարցին ի պատասխան՝ ասաց Ազգային ժողովի փոխնախագահ Ալեն Սիմոնյանը՝ խոսելով «Հայկական ժամանակ» օրաթերթի հրապարակման մասին, ըստ որի՝ ԱԱԾ նախկին տնօրեն Արթուր Վանեցյանը հակաքարոզչություն է իրականացրել Նիկոլ Փաշինյանի դստեր ու կնոջ նկատմամբ նաև պետական հեղաշրջում է նախապատրաստել:

«Իմ օրակարգում նման հարց չկա ու դա ինձ չի հետաքրքրում։ Կարծում եմ՝ նման հարցերը օրակարգ բերելը այն պարզ պատճառով է, որ այսօր որևիցե մեծ, հիմնական խնդիր, որը կարող է մեր քաղաքացիներին… ուզում եմ ասել՝ ուրիշ թեմա չկար խոսելու»,- ասաց Սիմոնյանը:

Դիտարկմանը՝ արդյոք իրավապահները պե՞տք է զբաղվեն Արթուր Վանեցյանի կողմից իրականացված ենթադրյալ հակաքարոզչությամբ, Ալեն Սիմոնյանն ասաց. «Քարոզչության հետ կապված ինչո՞ւ պետք է իրավապահները զբաղվեն»:

Հիշեցնենք, որ «Հայկական ժամանակ»-ը հունվարի 12-ին հոդված էր հրապարակել՝ նշելով, որ Նիկոլ Փաշինյանի ընտանիքի անդամների, մասնավորապես կնոջ` Աննա Հակոբյանի և դստեր` Մարիամ Փաշինյանի դեմ քարոզչական արշավը համակարգվում է ԱԱԾ նախկին տնօրեն Արթուր Վանեցյանի կողմից: Իսկ Մարիամ Փաշինյանը Facebook-ի իր էջում գրել էր, որ Վանեցյանների հետ բավականին կարճ ժամանակում հասցրել էր ընկերանալ և «ցավալի է, որ այդ ջերմությունը անկեղծ չի եղել, և Վանեցյանի կողմից այսպիսի դավադրություններ են կազմակերպվել մեր ընտանիքի դեմ»:

Թեմային անդրադարձել էր նաև ԱԱԾ նախկին տնօրեն Արթուր Վանեցյանը: «Տղամարդկային արժանապատվությունիցս ցածր է իջնել այդ մակարդակի: Ընտանիքն ինձ համար սրբություն է, իսկ այլոց վարկաբեկելու համար սեփական ընտանիքն օգտագործելու փորձերը` անընդունելի», – նշել էր Վանեցյանը։ Նա նաև դիմել է վարչապետի դստերը՝ Մարիամ Փաշինյանին. «Մարիամ ջան, աղջիկս, մի մտիր խնդրում եմ մեծերի անհասկանալի խաղերի մեջ»:

«Իմ քայլը» խմբակցության պատգամավոր Հրաչյա Հակոբյանն էլ Factor TV-ի եթերում հայտարարել էր, որ պետական հեղաշրջման փորձը քիչ պատճառ չէր Արթուր Վանեցյանին պաշտոնանկ անելու համար:

Մանրամասները՝ տեսանյութում:

Նարեկ Կիրակոսյան