ՌԴ վարչապետի թեկնածու Միշուստինը հայտարարել է նոր կառավարության փոփոխությունների մասին

Ռուսաստանի Դաշնային հարկային ծառայության ղեկավար Միխայիլ Միշուստինը, որին ՌԴ նախագահ Վլադիմիր Պուտինն առաջադրել է ՌԴ վարչապետի պաշտոնում, հայտարարել է նոր ծրագրերի մասին և որպես իր աշխատանքային առաջնահերթություններ նշել ազգային նախագծերն ու թվային տնտեսությունը։ Այս մասին հայտնում է ՏԱՍՍ-ը՝ հղում անելով Պետդումայի իշխող «Եդինայա Ռոսիա» կուսակցության խորհրդարանական խմբակցության ղեկավար Սերգեյ Նևերովին։

Աղբյուրի փոխանցմամբ՝ Նևերովը նշել է․ «Միշուստինն ասել է, որ խմբակցությունների հետ քննարկելու է նախարարների թեկնածության հարցը։ Նա ասել է, որ փոփոխություններ են լինելու»։

Նշենք, որ երեկ՝ չորեքշաբթի, Դաշնային ժողովին ուղղված հաղորդագրության մեջ, ՌԴ նախագահ Վլադիմիր Պուտինն առաջարկել է Սահմանադրության մեջ մի շարք փոփոխություններ կատարել․ մասնավորապես՝ Պետդումային փոխանցել վարչապետի, փոխվարչապետների և նախարարների թեկնածությունը հաստատելու իրավունքը:

Վլադիմիր Պուտինի և նախարարների հանդիպման ընթացքում ՌԴ վարչապետ Դմիտրի Մեդվեդևն այս համատեքստում ճիշտ է համարել ներկայիս կառավարության հրաժարական տալու որոշումը։ Ռուսաստանի նախագահը ստորագրել է հրամանագիր, որով Մեդվեդևը կստանձնի վարչապետի պարտականությունների ժամանակավոր կատարումը:

ՌԴ նախագահ Վլադիմիր Պուտինի` Դաշնային խորհրդի անդամներին ուղղված ելույթից հետո ՌԴ վարչապետ Դմիտրի Մեդվեդևը հայտարարել է, որ կառավարությունն ամբողջ կազմով հրաժարական է ներկայացնում:

Պուտինը Պետդումայում ՌԴ վարչապետի պաշտոնում առաջադրել է Դաշնային հարկային ծառայության ղեկավար Միխայիլ Միշուստինի թեկնածությունը: Պետդուման այսօր կքննարկի Միշուստինի թեկնածությունը։ Նախքան լիագումար նիստը, Միշուստինը կհանդիպի Պետդումայի բոլոր չորս խմբակցությունների հետ:

Նելլի Մելքոնյան