Աշխատունակների նկատմամբ վերաբերմունքն այնպիսին պետք է լինի, որ նրանց քաջալերենք՝ ավելի շատ շահագրգռված լինեն աշխատել. վարչապետ. ՏԵՍԱՆՅՈՒԹ

Կառավարության այսօրվա նիստին վարչապետ Նիկոլ Փաշինյանն անդրադարձավ սոցիալական համակարգին՝ նշելով, որ այն մարդկանց այդքան էլ աշխատանքի չի դրդում: Վարչապետն ասաց՝ սոցիալական համակարգի վերաբերյալ քննարկումներ են իրականացվում:

«Նախնական մակարդակում կոնկրետացրել ենք հայեցակարգային մոտեցումները, թե ինչ պետք է անենք»,- ասաց նա՝ ընդգծելով, որ համակարգի վերջնական ձևավորման շուրջ աշխատանքներին պետք է ներգրավվեն արդեն այլ գերատեսչություններ:

«Մենք արձանագրեցինք, որ սոցիալական լիարժեք աջակցություն պետք է ստանան Հայաստանի Հանրապետությունում այն մարդիկ, ովքեր աշխատունակ չեն, ունեն սահմանափակումներ, օբյեկտիվորեն չեն կարող իրենց կարիքները հոգալ, իսկ աշխատունակների նկատմամբ վերաբերմունքը այնպիսին պետք է լինի, որ նրանց քաջալերենք, որ ավելի շատ շահագրգռված լինեն աշխատել, քան թե ավելի շատ շահագրգռված լինեն չաշխատել»,- ասաց նա:

Նիկոլ Փաշինյանը նշեց, որ առաջարկվող համակարգը բարդ է, նախնական է, դեռ պետք է քննարկվի, և այն ընտանիքներն ուշադրության պետք է արժանանան, որտեղ երեխաներ կան, ընտանիքների կրթական կարիքները կարևորվեն: Վարչապետը կարևորեց նաև հանրության հետ քննարկումները՝ նշելով, որ հանրությունն իրենց հետ զուգընթաց պետք է քայլի:

Աշխատանքի և սոցիալական հարցերի նախարար Զարուհի Բաթոյանն էլ ասաց, որ երեկվա քննարկման արդյունքները տարածել են և շարունակում են տեղեկատվություն տրամադրել:

«Մասնագիտական և ոչ մասնագիտական հանրույթի հետ քննարկումները պետք է շարունակվեն հենց մշակման փուլում»,- հավելեց նախարարը:

Մանրամասները՝ տեսանյութում։

Նարեկ Կիրակոսյան