Քաղաքականություն
15.01.2020 | 12:21
ԱՄՆ-ն կարող է կրճատել Իրաքին տրամադրվող ռազմական օգնությունը, եթե այդ երկիրը ամերիկյան զորքերի դուրսբերման մասին որոշում կայացնի: ՌԻԱ Նովոստիի փոխանցմամբ՝ այս մասին գրում է Wall Street Journal-ը՝ վկայակոչելով ամերիկյան պաշտոնատար անձանց էլեկտրոնային նամակագրությունը:
Պարբերականի տվյալներով՝ Դոնալդ Թրամփի վարչակազմը պատրաստվում է 250 մլրդ դոլարով կրճատել Իրաքին տրամադրվող ռազմական օգնությունը, եթե Բաղդադը հանի ամերիկացի զինվորականներին:
Նշվում է, որ Կոնգրեսն արդեն հաստատել է այդ օգնությունը: Բացի այդ՝ վարչակազմը դիտարկում է տնտեսական և ռազմական այլ օժանդակության կրճատման հնարավորությունը: Վերջնական որոշում դեռևս չի ընդունվել:
ԱՄՆ ուժայինների կողմից Բաղդադում իրանցի գեներալ Ղասեմ Սոլեյմանիի սպանությունից հետո Իրաքի խորհրդարանն օրենքի ուժ չունեցող բանաձև է ընդունել, որը պահանջում է ամերիկյան զորքերի դուրսբերում: Ավելի ուշ տարածվեց Իրաքում ԱՄՆ-ի ուժերի հրամանատարի նամակը, որտեղ ասվում է զորքերի դուրսբերման նախապատրաստման մասին: Սակայն Պենտագոնը հայտարարեց, որ այն ընդամենը սևագիր է եղել, իսկ ԱՄՆ պաշտպանության նախարար Մարկ Էսպերը հայտարարեց, որ ամերիկացիներն Իրաքը լքելու ծրագրեր չունեն:
