14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կարծում եմ՝ Եղվարդի ծննդատունը չպետք է լուծարվի․ Ռոմանոս Պետրոսյանը հանդիպեց Եղվարդի հիվանդանոցի բուժանձնակազմի հետ
Հասարակություն
14.01.2020 | 16:38
Կոտայքի մարզպետ Ռոմանոս Պետրոսյանն այցելել է Եղվարդ՝ հանդիպելու «Նաիրի» բժշկական կենտրոնի բուժանձնակազմի ու շահագրգիռ քաղաքացիների հետ։ Նա լրագրողների հետ զրույցում նշեց, որ իր կարծիքով՝ Եղվարդի ծննդատունը չպետք է լուծարվի, ավելին՝ պետք է վերազինվի։
Մարզպետն անդրադառնալով այն հարցին, որ հնարավո՞ր է հետագայում ծննդատան բաժանմունքը փակվի, պատասխանեց․ «Եկեք «եթե»-ներով չառաջնորդվենք։ Մենք արձանագրում ենք մի բան՝ այս պահին Եղվարդ քաղաքը և Նաիրի տարածաշրջանն ունի ծննդատուն։ Այն աշխատում է ամբողջ հզորությամբ, սպասում ենք մեր ծննդկաններին։ Իսկ վաղը, թե ինչ զարգացում կլինի, պետք է արձանագրենք, որ մենք քաղաքացիակենտրոն քաղաքականություն ենք իրականացնում, մեր քաղաքացու շահը դոմինանտ է, բնականաբար, պետական շահի հետ պետք է համադրել և բոլոր դեպքերում քաղաքացիների հետ մեր երկխոսությունը ժողովրդական իշխանությանը հարիր է»։
Ռոմանոս Պետրոսյանը նկատեց, որ այն մտահոգությունները, որոնք երկու օր է՝ հնչում են այս բակում, ինքը 10 օր առաջ հնչեցրել է նախարարությունում։ «Այն հանգամանքները, որոնք մեջբերում են մեր քաղաքացիներն, ինքս էլ գիտեմ, որովհետև մարզի բնակիչ եմ։ Այդ առումով տարընկալում չի կարող լինել, և նաև խնդրում եմ մեր գործընկերներին հարցը հանկարծ չքաղաքականացնել, թույլ չտալ որոշակի շրջանակների այս հարցը շահարկելու և «շագանակներ հանելու»։ Իսկ որ ծնելիության աճը մեր առաջնահերթություններից է, մեր ժողովրդի անվտանգությունը, բարեկեցությունը մեր քաղաքական թիմի թիվ մեկ առաջնահերթությունն է, դա աներկբա է»,- նշեց մարզպետը։
