Քաղաքականություն
14.01.2020 | 11:07
Ամերիկայի իրանցիները կիրակի օրը մայրաքաղաք Վաշինգտոնում և Լոս Անջելեսում հարգանքի տուրք են մատուցել ուկրաինական խոցված ինքնաթիռի ու Իրանում ցույցերի ժամանակ սպանված զոհերի հիշատակին: Նրաք նաև դեմ են խոսել պատերազմին. գրում է amerikayidzayn.com-ը:
Մայրաքաղաք Վաշինգտոնի կենտրոնում կրակի օրը հավաքված մի խումբ ամերիկացի իրանցիներ մոմավառությամբ իրենց հարգանքի տուրքն են մատուցել անմեղ զոհերի հիշատակին, ովքեր զոհվել են ուկրաինական ինքնաթիռի խոցման և Իրանում հակակառավարական ցույցերի արդյունքում:
«Մարդիկ չեն ուզում այլևս այս իշխանությանը: Ղասիմ Սոլեյմանին էլ ահաբեկիչ էր»,- ասում է ամերիկաիրանցի Լիլին:
«Այնտեղ եթե դուրս գաք, մասնակցելու փողոցային բողոքի ցույցի, ապա կարող եք կամ սպանվել կամ ձերբակալվել: Այս մարդիկ շատ խիզախ են»,- նշում է մեկ այլ ցուցարար` Մոնիրը:
ԱՄՆ նախագահ Թրամփն իր աջակցությունն է հայտնել ցուցարարներին թվիթերյան գրառման միջոցով: Ցուցարարները երախտագիտություն են հայտնում ԱՄՆ նախագահին, բայց դեմ են ռազմական բախմանը:
«Շատ հաճելի է նրա կողմից թվիթերում գրառումները պարսկերեն և անգլերեն կատարելը, սակայն ուզում ենք նրան ասել, որ դեմ ենք պատերազմին»,- նշում է ամերիկացի իրանցի ցուցարար Ֆարամարզ Զաֆին:
Ամերիկացի իրանցիների մեկ այլ խումբ հավաքվել էր Լոս Անջելեսում: Նրանցից շատերը բարձրաձայնում էին ընդդեմ ներխուժմանը Իրան:
«Կարևոր է գիտակցել, որ Իրանում մարդիկ գիտեն, թե ինչ են ուզում: Մարդիկ այնտեղ պայքարում են հանուն իրենց ազատության: Մեզ պետք չեն փրկիչներ: ԱՄՆ-ին չի հետաքրքրում մեր ճակատագիրը»,- ասում է իրանական ծագումով ամերիկացի Համութ Դոլաթշահին:
Այս վերջին օրերին հրապարակվել են մի շարք տեսանյութեր Թեհրանից, ուր մարդիկ դուրս են եկել բողոքի ցույցի: Այստեղ հնչում են հակակառավարական կոչեր:
