14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
Հայաստանի պետական սիմֆոնիկ նվագախումբը 2020-ը սկսում է եվրոպական հյուրախաղերով
Մշակույթ
06.01.2020 | 14:21
Հայաստանի պետական սիմֆոնիկ նվագախումբը 2020 թվականը սկսում է եվրոպական աննախադեպ համերգային շրջագայությամբ։ Նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ, հունվարի 8-21-ը ելույթներ կունենա Եվրոպայի 5 երկրի (Գերմանիա, Մեծ Բրիտանիա, Ավստրիա, Չեխիա, Ռուսաստան) լավագույն համերգասրահներում։ Դասական երաժշտության ութ համերգները կկայանան՝ հունվարի 8-ին Մյունխենի Gasteig մշակութային կենտրոնում, հունվարի 9-ին՝ Զալցբուրգի Grobes Festspielhaus-ում, հունվարի 10-ին՝ Շտուտգարտի «Բեթհովեն» դահլիճում, հունվարի 12-ին՝ Բեռլինի ֆիլհարմոնիայի համերգասրահում։ Հունվարի 14-ին Հայաստանի պետական սիմֆոնիկ նվագախումբը բեմ կբարձրանա Լոնդոնի Բարբիկան կենտրոնում, հունվարի 17-ին՝ Վիեննայի Մյուզիքվերեյնում, հունվարի 19-ին՝ Պրահայի Ռուդոլֆինումում և հունվարի 21-ին՝ Մոսկվայի «Զարյադյե» դահլիճում։
Ըստ ՀՊՍ նվագախմբի հաղորդագրության՝ եւրոպացի խստապահանջ ունկնդրի առջև Հայաստանի պետական սիմֆոնիկ նվագախումբը հնչեցնելու է Ջոն (Ջիվան) Տեր-Թադևոսյանի Երկրորդ սիմֆոնիան՝ «Մարդու ճակատագիրը», որը 20-րդ դարի հայ կոմպոզիտորական արվեստի լավագույն սիմֆոնիաներից է։ Եվրոպացի ունկնդիրը պետական սիմֆոնիկ նվագախմբի շնորհիվ առաջին անգամ կբացահայտի Ջոն Տեր-Թադևոսյան կոմպոզիտորին ու նրա արվեստը։ «Մարդու ճակատագիրը», որ կոմպոզիտորը գրել է Միխայիլ Շոլոխովի համանուն պատմվածքից ստացած տպավորությունների հիման վրա, 2019 թվականին պետական սիմֆոնիկ նվագախումբը` Սերգեյ Սմբատյանի ղեկավարությամբ, ձայնագրել է. ձայնագրության երաժշտական պրոդյուսերն էր Գրեմմիի բազմակի մրցանակակիր Քրիստոֆեր Ալդերը։
