10.01.2025 | 23:14
ՊԵԿ նախագահն ընդունել է Հնդկաստանի դեսպանին
ԱԳ նախարարի տեղակալը հանդիպել է ՀՀ-ում հավատարմագրված մերձավորարևելյան տարածաշրջանի երկրների դիվանագետների հետ
Քաղաքականություն
27.12.2019 | 18:45
Դեկտեմբերի 26-ին ԱԳ նախարարի տեղակալ Գրիգոր Հովհաննիսյանի նախաձեռնությամբ տեղի է ունեցել ամփոփիչ հանդիպում Հայաստանում Արաբական Միացյալ Էմիրությունների դեսպան Մուհամմադ Ալ-Զաաբիի (Mohamed AlZaabi), Եգիպտոսի դեսպան Բահաա Էլ Դին Բահգատ Դիսուկիի (Bahaa El Din Bahgat Dessouki), Լիբանանի դեսպան Մայա Դաղերի (Maya Dagher), Իրաքի դեսպանության երրորդ քարտուղար Դալյա Ահմեդի (Dalya Ahmed) և Սիրիայի դեսպանության հյուպատոս Բաշար Սաֆիեի (Bashar Safie) հետ:
«Հանդիպման ընթացքում ՀՀ ԱԳ նախարարի տեղակալը ներկայացրեց մերձավորարևելյան ուղղությամբ Հայաստանի վարած քաղաքականությունը և առաջնահերթությունները: Մերձավորարևելյան տարածաշրջանի գործընկերների հետ ամփոփվեցին ընթացիկ տարվա ընթացքում համատեղ իրականացված աշխատանքները՝ գոհունակությամբ արձանագրելով ձևավորված օրակարգերի բազմակողմանիությունը: Միաժամանակ քննարկվեցին առաջիկա տարում նախատեսվող կարևոր միջոցառումներն ու ծրագրերը:
Որպես նոր հեռանկարային ուղղություններ` Միջին Արևելքի արաբական երկրների դեսպաններին ներկայացվեցին հայաստանյան բուհերի օտարերկրյա ուսանողների ընդունելության հնարավորությունները և բարձրագույն կրթության ոլորտում փոխանակման ծրագրերի իրականացման հեռանկարներն արաբական երկրների համալսարանների հետ: Անդրադարձ կատարվեց նաև Հայաստանի մարզերի արտադրանքի արտահանման ու զբոսաշրջության զարգացման հնարավորություններին»,- ասված է գերատեսչության տարածած հաղորդագրությունում:
