03.03.2026 | 23:33
«Դա ձեզ համար Ուինսթոն Չերչիլը չէ». Թրամփը հայտարարել է, որ հատկապես դժգոհ է Մեծ Բրիտանիայի արձագանքից
Աշխատանքի անցնելուց հետո քաղաքացին վեց ամիս նպաստից չի զրկվի
Հասարակություն
26.12.2019 | 22:04
ՀՀ աշխատանքի և սոցիալական հարցերի նախարարությունից տեղեկացնում են, որ ընտանեկան կամ սոցիալական նպաստ ստացող ընտանիքի աշխատունակ անդամներն աշխատանքի անցնելու դեպքում կշարունակեն վեց ամիս նպաստ ստանալ, սակայն երկու անգամ համապատասխան աշխատանք առաջարկելու և մերժում ստանալուց հետո պետությունը կդիտարկի նպաստից զրկելու տարբերակը: ՀՀ աշխատանքի և սոցիալական հարցերի նախարարության առաջարկած այս նախագիծը հավանության է արժանացել ՀՀ կառավարության կողմից։
«Նախագծով առաջարկվում է հնարավորություն տալ ընտանեկան կամ սոցիալական նպաստ ստացող ընտանիքի աշխատունակ անդամներին աշխատանքի անցնելու դեպքում վեց ամիս շարունակ ստանալ նպաստ: Այս փոփոխությամբ, ընտանիքի աշխատունակ, բայց գործազուրկի կարգավիճակ ունեցող անդամի հետ Զբաղվածության պետական գործակալությունը աշխատանք պետք է տանի: Աշխատանքի անցնելու դեպքում ևս վեց ամիս նպաստ կտրամադրվի, սակայն այն պարագայում, երբ անձը կհրաժարվի երկու աշխատանքի առաջարկից, տեղի կունենա անապահովության միավորի կտրուկ նվազում՝ հանգեցնելով նաև նպաստի իրավունքի կորստի»,- պարզաբանել է Աշխատանքի և սոցիալական հարցերի նախարար Զարուհի Բաթոյանը:
Նախարարի տեղեկացմամբ, փոփոխությունը ուժի մեջ կմտնի 2020 թվականի ապրիլի 1-ից և այն կվերաբերվի համակարգ մուտք գործելու համար նոր դիմող կամ նոր փաստագրվող քաղաքացիներին։
Նշենք, որ որոշման համաձայն, կսահմանափակվի նաև սոցիալական որևէ խումբ չունեցող քաղաքացիների՝ նպաստի համակարգում ընդգրկվելու հնարավորությունը և աջակցությունը կուղղվի ավելի շատ կարիքավոր խմբերի:
Ի դեպ, նպաստառուների ցանկ մուտք գործելու համար հաշվի կառնվի նաև 100 000 դրամ և ավելի միջին ամսական վարկային մարում կատարելու հանգամանքը:
