15.10.2026 | 11:05
Կառավարության նիստը` ՈՒՂԻՂ
Անցած 9-ը ամսվա ընթացքում Երևանում հայտնաբերվել է 87 հանցավոր խումբ՝ 195 անձով, որոնք կատարել են 301 հանցագործություն
Հասարակություն
17.10.2017 | 20:25
Հոկտեմբերի 17-ին ոստիկանության Երևան քաղաքի վարչությունն ամփոփել է անցած ինը ամիսների օպերատիվ-ծառայողական գործունեության արդյունքները։ Խորհրդակցությունը վարել է վարչության պետ Սարգիս Մարտիրոսյանը։
ՀՀ ոստիկանության լրատվական ծառայությունից հաղորդում են, որ ներկայացվել է անցած ինը ամիսներին մայրաքաղաքում հանցավորության շարժընթացի և հանցագործությունների բացահայտման վիճակագրությունը։
Այսպես, անցած ինը ամիսներին մայրաքաղաքում արձանագրվել է հանցագործության 7069 դեպք. բացահայտվել է 5899-ը։ 269-ով նվազել են ծանր հանցագործության դեպքերը։
Ձեռնարկված ծավալուն միջոցառումների արդյունքում՝ բացահայտման ցուցանիշը կազմել է 83,4 տոկոս՝ նախորդ տարվա նույն ժամանակահատվածի համեմատ՝ 13,2 տոկոսով ավելի։ Մասնավորապես աճել է ծանր հանցագործությունների բացահայտման ցուցանիշը՝ 17,9 տոկոս։
Անդրադառնալով հնչեղություն ունեցող հանցատեսակներին՝ նշվել է, որ անցած ինը ամիսներին մայրաքաղաքում արձանագրված սպանության ինը դեպքից ութը բացահայտվել են ձեռնարկված օպերատիվ-հետախուզական և քննչական միջոցառումների արդյունքում։
Անցած ինը ամիսների ընթացքում Երևան քաղաքում հայտնաբերվել է 87 հանցավոր խումբ՝ 195 անձով, որոնք կատարել են 301 հանցագործություն։
Նշվել է նաև, որ դրական ցուցանիշներն ու ձեռքբերումները պայմանավորված են ինչպես ոստիկանության բոլոր ստորաբաժանումների, այնպես էլ դատախազության, քննչական կոմիտեի և ազգային անվտանգության ծառայության հետ ակտիվ համագործակցությամբ։
Վեր են հանվել նաև բացթողումներն ու հիմնախնդիրները և դրանց վերացման աշխատանքների արդյունավետությանն ուղղված կոնկրետ առաջարկներ են արվել։
Ամփոփելով նիստը՝ ոստիկանության Երևան քաղաքի վարչության պետ Սարգիս Մարտիրոսյանը տվել է համապատասխան հանձնարարականներ։
