03.03.2026 | 23:33
«Դա ձեզ համար Ուինսթոն Չերչիլը չէ». Թրամփը հայտարարել է, որ հատկապես դժգոհ է Մեծ Բրիտանիայի արձագանքից
«Խնդիր բնակարան վերանորոգողների համար». շինթույլտվության տեղական տուրքը 50-60 հազար դրամով ավելանում է. ՏԵՍԱՆՅՈՒԹ
Հասարակություն
25.12.2019 | 12:47
Երևանի ավագանին այսօրվա նիստում հաստատեց Երևան համայնքում տեղական տուրքերի 2020 թվականի դրույքաչափերը բարձրացնելու նախագիծը։ Հիմնական զեկուցող, քաղաքապետարանի աշխատակազմի և եկամուտների հաշվառման և գանձման վարչության պետ Արմեն Հարությունյանը նշեց, որ նախագծով հիմնականում պահպանվել են 2019թ. տուրքերի դրույքաչափերն ու տեսակները։ Փոփոխության են ենթարկվել Տեղական տուրքերի և վճարների մասին ՀՀ օրենքի 12-րդ հոդվածի 1-ին մասի որոշ կետեր:
«Մինչև 300 ք.մ. մակերես ունեցող բնակելի և մինչև 200 ք.մ. ընդհանուր մակերես ունեցող հասարակական և արտադրական նշանակության շենք-շինությունների շինթույլտվությունների համար, 2019թ. նախատեսված 75.000-ի փոխարեն, 2020 թվականին նախատեսվել է 105.000 դրամ»,- ներկայացրեց Արմեն Հարությունյանը և հավելեց, որ փոփոխություններն այսքանով չեն ավարտվում:
Օրինակ, նույն հոդվածի այլ կետերի համաձայն՝ 200-ից մինչև 500 ք.մ. ընդհանուր մակերես ունեցող շենք-շինությունների համար տեղական տուրքը սահմանվել է 2020թ. համար՝ 210.000 դրամ, մինչդեռ 2019թ. սահմանված էր 150.000 դրամ։ 500-ից մինչև 1.000 ք.մ. ընդհանուր մակերես ունեցող շենք-շինությունների համար, 2019թ. 250.000 դրամի փոխարեն, 2020թ. համար սահմանվել է 300.000 դրամ։ Շենք-շինությունների վերակառուցման, վերականգնման, ուժեղացման, արդիականացման և բարեկարգման աշխատանքների համար 2020թ. տեղական տուրք է սահմանվել 21.000 դրամ, իսկ 2019թ. սահմանվել էր 15.000 դրամ։
Փոփոխությունները, ըստ էության, ավագանու «Լույս» խմբակցության անդամների հավանությանը չարժանացան։ Խմբակցության ղեկավար Դավիթ Խաժակյանը նշեց, որ 300 ք.մ. մակերես և դրանից քիչ մակերես ունեցող տարածքների համար, որոնք կարող են լինել փոքր կրպակներ, արդարացված չէ տեղական տուրքերի ավելացումը, որովհետև դրանով վնաս կպատճառվի տարածքների ներկայացուցիչներին:
Խմբակցության անդամ Թեհմինա Վարդանյանն էլ ընդգծեց. «Հիմնականում, էլի խփում ենք ցածր խավին, տնտեսվարողներն այս ոլորտում քիչ են, որովհետև մարդիկ իրենց սեփական բնակարանները վերանորոգելու համար ստիպված են լինելու ավելի մեծ գումար վճարել։ Հետո էլ ասում եք՝ ընդդիմանում եք: Չենք ընդդիմանում, չենք ուզում քաղաքացու վրա ահռելի բեռն դնել»։
«Լույս» խմբակցության ղեկավարը հավելեց, որ դեմ են նախագծին։ Նախագիծը դրվեց քվեարկության, այն ընդունվեց 42 կողմ, 4 դեմ, 6 ձեռնպահ ձայնով։
Մանրամասները՝ տեսանյութում:
Նարեկ Կիրակոսյան
