26.09.2026 | 20:38
Քաղաքացին ընկել է ջրհորը. նա հոսպիտալացվել է
Մենք միշտ ապրելու և արարելու ենք հենց Թալիշում. համայնքը համայն հայության ուշադրության կենտրոնում է
Քաղաքականություն
24.12.2019 | 21:05
Մարտակերտի շրջանի Թալիշ համայնքն այսօր ունի նորակառույց դպրոց, մանկապարտեզ, համայնքապետարան, բուժկետ, ակումբ, նորակառույց բնակարաններ, անհրաժեշտ ենթակառուցվածքներ:
Այս մասին «Արցախպրես»-ի թղթակցի հետ զրույցում ասել է Թալիշի համայնքի ղեկավար Վարուժան Օհանյանը:
Նրա խոքով՝ երկրի ղեկավարությունը մշտական ուշադրության կենտրոնում է պահում գյուղի խնդիրները:
«Համայնքի Ճանապարհների մի մասը վերանորոգված է. 2020 թվականին նախատեսվում է ասֆալտապատել Մատաղիս-Թալիշ ավտոճանապարհը: Լուսավորության հարցը գրեթե լուծված է: Գյուղում ինչպես նախկինում, այժմ էլ գազ չկա: Բնակիչներն օգտագործում են էլեկտրաէներգիա, որի ծախսի մի մասը սուբսիդավորում է պետությունը՝ մեկ շնչի համար ամսական տրամադրելով շուրջ 1900 ՀՀ դրամ: Ունենք նորակառույց մանկապարտեզ, որը կգործի 2020 թվականի հունվարից. գյուղում կա նախադպրոցական տարիքի 12 երեխա: Թալիշի եռահարկ դպրոցն ունի 26 աշակերտ: Ներկայումս գյուղում կա 49 բնակեցված տուն: Ընթացքի մեջ են ևս հինգ բնակարանի վերակառուցման աշխատանքներ, որոնք նախատեսվում են ավարտին հասցնել գալիք տարի: Մատաղիսում ժամանակավոր բնակություն հաստատած թալիշցի 5 ընտանիքներ սպասում են հենց այդ բնակարանների շահագործմանը»,-մանրամասնել է համայնքի ղեկավարը՝ նշելով, որ թալիշցիների հիմնական զբաղմունքը հողագործությունն ու անասնապահությունն է:
Վ. Օհանյանն ընդգծել է, որ Թալիշն օր օրի զարգանում և գեղեցկանում է. բնակիչների մեծ մասը ցանակնում են գյուղ վերադառնալ:
«Մեր համայնքը ոչ միայն երկրի ղեկավարության, այլև համայն հայության ուշադրության կենտրոնում է, որը ևս ոգևորում է այստեղ ապրողներիս: Չնայած մարդիկ մի քանի անգամ կորցրել են իրենց տները, բայց միևնույն է՝ նրանք լցված են լավատեսությամբ, և հավատով են ապրում գյուղում»,-ավելացրել է Վ. Օհանյանը:
Խոսելով գյուղի խնդիրների մասին՝ համայնքի ղեկավարն ասել է, որ առաջնայինը ճանապարհների բարեկարգման և ասֆալտապատման հարցն է, որից հետո շուրջօրյա մշտական ջուր ունենալը, իսկ մյուս մանր խնդիրները ժամանակի ընթացքում կստանան դրական լուծումներ:
Թալիշի բնակիչ Նաիրա Բալայանը մեզ հետ զրույցում պատմել է, որ արդեն երկու ամիս է ինչ ինքն իր ընտանքիով մշտական բնակություն է հաստատել հայրենի Թալիշ գյուղում. մինչ այդ իրենք ապրում էին Ալաշանում:
«Մեզ ապահովել են վերանորոգված և կահավորված բնակարաններվ: Ներկայումս միայն ջրի խնդիր ունենք, որն էլ հուսով ենք առաջիկայում լուծում կստանա: Մեր գյուղն օրեցօր բարգավաճում է, բնակիչները ցանկություն են հայտնում վերադառնալ գյուղ: Մենք երբեք չենք լքելու մեր հարազատ գյուղը, մենք միշտ ապրելու և արարելու ենք հենց Թալիշում: Թող թուրքն իմանա, որ թալիշցին ուժեղ է և անվախ»,-մասնավորապես ասել է Ն. Բալայանը:
