Քաղաքականություն
16.05.2017 | 16:21
Փարիզում ապրող ֆրանսահայ հասարակական գործիչ Արման Ավագյանը Facebook-ի իր էջում գրառմամբ տեղեկացրել է, որ Ֆրանսիայի նորընտիր նախագահ Էմանուել Մակրոնը իր վարչակազմում հայազգի գործիչների է տեսնում:
Ըստ Ավագյանի գրառման՝ Ֆրանսիայի աշխատանքի նախարարի ամենահավանական թեկնածուն հայազգի Աստրիդ Փանոսյանն է, իսկ 59-ամյա հայ գործարար Ժակ Մարիլոսյանն էլ՝ ապագա պատգամավոր:
«Հայազգի Աստրիդ Փանոսյանը՝ Ֆրանսիայի աշխատանքի նախարարի հավանական թեկնածու։
Նա ապահովագրական մեծ ձեռնարկության գլխավոր տնօրենն է։
Տիկին Փանոսյանը նորընտիր նախագահ Էմանուել Մակրոնի հավատարիմ և բանիմաց խորհրդականներից մեկն է եղել վերջինիս էկոնոմիկայի նախարար եղած ժամանակ։
Հաշվի առնելով,որ գործազրկությունը համար առաջին խնդիրն է Մակրոնի համար, նա որպես աշխատանքի նախարար պետք է ընտրի կոմպետենտ և վստահելի մարդու՝ իրեն մոտ կանգնած շրջանակից։
Պատասխանը՝ այսօր երեկոյան,երբ Ելիսեյան պալատը կհայտարարի նորանշանակ վարչապետ Էդուարդ Ֆիլիպի նախարարական ողջ կազմը»,- գրել է հայ հասարակական գործիչը:
Ֆեյսբուքյան մեկ այլ գրառմամբ Արման Ավագյանը տեղեկացրել է Ժակ Մարիլոսյանի մասին. «Ժակ Մարիլոսյան,59 տարեկան,գործարար։ Եվս մեկ հայազգի պատգամավորի թեկնածու Էմանուել Մակրոնի կուսակցությունից ՝ առաջադրված Փարիզի հարավային շրջանում»,- գրել է նա:
