«Կարևոր է հասկանալ՝ ինչպես են պատմական շենքերը սեփականաշնորհվել». «Փրկենք տպարանի շենքը» նախաձեռնության անդամ. ՏԵՍԱՆՅՈՒԹ

Կարծում եմ՝ տպարանի շենքը, որի մասին այսքան խոսում ենք, բազմաթիվ սեփականատերեր ունի: Շենքը միայն այդ 3-րդ հարկը չէ, որը նախարարությունը թատրոնին է տալիս: Այս մասին այսօր՝ «Հուշարձանների պահպանության հարցը. տպարանի շենք» թեմայով քննարկման ընթացքում նշեց «Փրկենք տպարանի շենքը» նախաձեռնության անդամ Իզաբելլա Սարգսյանը:

«Կարևոր է հասկանալ՝ ինչպես են սեփականաշնորհվել պատմական հուշարձանները: Մենք կենտրոնացել ենք այդ 3-րդ հարկի վրա, բայց ամբողջ շենքը բազմաթիվ փոփոխությունների է ենթարկվել: Գուցե դա սկի՞զբ է՝ հասկանալու, թե ինչ է տեղի ունեցել մնացած հուշարձանների հետ: Տեսնենք՝ հիմա ինչպես են վարվելու նոր իշխանությունները»,- ասաց Իզաբելլա Սարգսյանը:

Ըստ նրա՝ հուշարձաններին վերաբերող հարցերը պետք է ոչ թե առանձին-առանձին քննարկվեն, այլ համալիր լուծումներ տրվեն: «Ինչ որոշում էլ լինի, որ գծին էլ կանգնենք, պետք է լավ կոմունիկացված լինի հանրության և մասնագիտական շրջանակի հետ: Եթե հիմա ժամանակ չներդնենք հանրային քննարկումների մեջ, վերջում էլի իշխանությունը ժողովրդից կանջատվի»,- ասաց Իզաբելլա Սարգսյանը:

Հիշեցնենք, որ դեկտեմբերի սկզբին Գևորգ Քոչար 21 հասցեում Կրթության, գիտության, մշակույթի և սպորտի նախարությունը հայտարարեց Մնջախաղի թատրոնի նոր շենքի շինաշխատանքների մեկնարկի մասին։ Նախկին գրապալատի շենքի շուրջ բուռն քննարկումները, սակայն, դեռ շարունակվում են։ Ֆեյսբուքում՝ «Փրկենք տպարանի շենքը» էջ է ստեղծվել, որտեղ մի խումբ մարդիկ ստորագրահավաք են կազմակերպել:

Մանրամասները՝ տեսանյութում:

Նելլի Մելքոնյան