Շեշտակի տնտեսական աճ ունենալու համար պետք է ավելացնենք տնտեսական աճի պոտենցիալը. Արկադի Խաչատրյան. ՏԵՍԱՆՅՈՒԹ

Որպես դրական կողմ՝ նախ կնշեի, որ Հայաստանում պահպանվում է մակրոտնտեսական կայունությունը՝ ներառյալ ֆինանսական կայունությունը, ինչը չափազանց կարևոր է. պարտքի կայունացման միտումն է դրական և, իհարկե, տեսանելի են համակարգային կոռուպցիայի դեմ պայքարի արդյունքները, ու ըստ այդմ՝ սպասվում է պետական բյուջեի ծախսային հատվածի ավելացում։ Այս մասին «Տնտեսությունը 2019 թվականին. արդյունքներ և մտահոգիչ միտումներ» թեմայով քննարկման ժամանակ ասաց ԱԺ «Լուսավոր Հայաստան» խմբակցության անդամ Արկադի Խաչատրյանը։

Նա նկատեց, որ այս բոլորն անհրաժեշտ հիմքեր են ստեղծում տնտեսական խորը բարեփոխումներ իրականացնելու համար և շեշտակի դրական արդյունքներ արձանագրելու համար։

«Որպեսզի մենք խոսենք տնտեսական հեղափոխության և հետագա շեշտակի բարելավումների մասին, պետք է խորքային, կառուցվածքային և ինստիտուցիոնալ բարեփոխումներ իրականացնենք։ Այստեղ է, որ մենք, կարծես, հապաղում ենք։ Այստեղ, որպես լուրջ խնդիր, մենք մշտապես մատնանշում ենք ռազմավարական ծրագերի տեսլականների բացակայությունը։ Մեր լուրջ պրոբլեմները հետևյալն են․ նախ դա այն է, որ մյուս տարվա համար կանխատեսվում է տնտեսական աճի պոտենցիալ 4․5-5 տոկոս։ Սա լրջագույն սահմանափակող և լրջագույն տնտեսական խնդիր է հետագա աճի առումով։ Հետագա շեշտակի տնտեսական աճ ունենալու համար պետք է բոլոր ջանքերն ուղղենք տնտեսական աճի պոտենցիալի ավելացմանը։ Դա ենթադրում է 2 ուղղություն՝ կապիտալ ծախսեր և ներդրումները»,- ասաց Խաչատրյանը։

Մանրամասները՝ տեսանյութում։