Զինկոմիսարիատի շենքում փլուզումից տուժած քաղաքացիները վերակենդանացման բաժանմունքից տեղափոխվել են հիվանդասենյակ

Երևանի Հալաբյան 19 ա հասցեում գտնվող N1 Զինվորական կոմիսարիատի շենքում երեկ տեղի ունեցած փլուզումից տուժած երեք քաղաքացիները, որոնք տեղափոխվել էին «Արմենիա» ՀԲԿ-ի վերակենդանացման բաժանմունք, այսօր տեղափոխվել են հիվանդասենյակ։

Այս մասին Factor.am-ի հետ զրույցում տեղեկացրին «Արմենիա» ՀԲԿ-ի վերակենդանացման բաժանմունքից։

«Նրանց վիճակը գնահատվում է կայուն»,- փոխանցեցին ԲԿ-ից։

Հիշեցնենք, որ երեկ փլուզվել էր Հալաբյան փողոցի թիվ 19ա հասցեում գտնվող թիվ 1 զինկոմիսարիատի (2 հարկանի շինություն) 1-ին հարկի սենյակներից մեկի (ծառայում է որպես դահլիճ) հատակը (մոտ 30 քմ):

Մինչ փրկարարների՝ կանչի վայր հասնելը 1 տուժած հոսպիտալացվել էր «Արմենիա» ՀԲԿ: Իրավիճակը պարզաբանելու նպատակով Ճգնաժամային կառավարման ազգային կենտրոնի օպերատիվ խումբը մեկնել էր «Արմենիա» ՀԲԿ, որտեղ պարզվել էր, որ հոսպիտալացվել են Էրիկ Վ.-ն (ծնված 2001 թ.), Հայկ Մ.-ն (ծնված 2001 թ.), Արթուր Մ.-ն (ծնված 2001 թ.), Խաչատուր Թ.-ն (ծնված 2001 թ.), Գրիգոր Թ.-ն (ծնված 2001 թ.), Միհրան Ա.-ն (ծնված 2001 թ.), Ժորա Ա.-ն (ծնված 2001 թ.), Ռաֆիկ Մ.-ն (ծնված 2001 թ.), Աշոտ Ի.-ն (ծնված 2001 թ.), Հայկ Մ.-ն (ծնված 2000 թ.), Տիգրան Հ.-ն (ծնված 2001 թ.), Արտաշես Ն.-ն (ծնված 2001 թ.), Անահիտ Ա.-ն (ծնված 1957 թ․) և Նաիրա Մ.-ն (ծնված 1974 թ․):

Բժիշկները Նաիրա Մ.-ի, Հայկ Մ.-ի (ծնված 2001 թ.) և Էրիկ Վ.-ի առողջական վիճակը գնահատել էին կայուն ծանր, իսկ մյուսները, ստանալով համապատասխան բուժօգնություն, դուրս էին գրվել: