29.05.2026 | 23:37
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
Արարատի մարզում գյուղատնտեսական մթերքի շուկա կգործի․ Գարիկ Սարգսյան
Տնտեսություն
20.12.2019 | 15:08
Գյուղատնտեսության ոլորտում լավ արդյունքներ ենք գրանցել՝ 2019 թվականին խաղողի մթերման ծավալները, գրեթե, կրկնակի ավելացել են: Այս մասին տարեվերջյան ամփոփիչ ասուլիսի ժամանակ ասաց Արարատի մարզպետ Գարիկ Սարգսյանը։ Նա տեղեկացրեց, որ խաղողի մթերումը կազմել է 110.000 տոննա՝ 2018 թվականի 62.623 տոննայի դիմաց:
Մարզպետը նշեց, որ անցնող տարում ավելացել են նաև ջերմոցային տնտեսությունների թիվը, և եթե 2018 թվականին դրանք կազմել են 320 հա, ապա 2019 թվականին դրանց թիվն ավելացել է՝ կազմելով 360 հա: Ոռոգման սեզոնին, մարզպետի հավաստմամբ, լուրջ խնդիրներ ևս չեն ունեցել։ Ասուլիսի ընթացքում նա խոսեց նաև «Իմ քայլը հանուն Արարատի մարզի» բիզնես ներդրումային ֆորումի մասին և նկատեց, որ ֆորումի ընթացքում ներկայացվել են մի շարք ծրագրեր, որոնցից այս պահին 3 խոշոր ծրագրերն են իրականացվում։
«Երևան-Երասխ ավտոճանապարհի վրա՝ Մխչյան համայնքի հարակից տարածքում կառուցվում է 11 հեկտար մեծությամբ գյուղատնտեսական՝ մանրածախ և մեծածախ գյուղմթերքի շուկա, որը կարող է միացնել Մասիսի ու Արտաշատի տարածաշրջանները: Նախատեսվում է կառուցել նախատեսված տաղավարներ, ավտոկայանատեղի, մրգի սառնարաններ, պահեստներ, ճաշարաններ, սանհանգույցներ, խանութներ, հյուրատուն։ Շինարարական աշխատանքները մեկնարկել են, և այն բացվելու է հաջորդ տարի»,- ասաց մարզպետը։
Գարիկ Սարգսյանի փոխանցմամբ՝ երկրորդ խոշոր ծրագիրը մարզի Քաղցրաշեն համայնքում է իրականացվում, գործարարի կողմից իրականացվում է խաղողի այգիների տնկում, կառուցվում է գինու և կոնյակի գործարան։
«Հաջորդ ներդրումային ծրագիրը վերաբերում է սոյայի աճեցմանը: Ծրագրի երկրորդ փուլում նախատեսվում է կառուցել վերամշակման գործարան, ինչը կնպաստի նաև աշխատատեղերի ստեղծմանը»,- նշեց Սարգսյանը։
Նա տեղեկացրեց, որ մարզում վերականգնվում է նաև բամբակագործությունը։ Մարզպետը նաև նշեց, որ տարիների ընթացքում կուտակած պարտքերն են մարել «Արտաշատի», «Վեդու», «Արարատի» ԲԿ-ները:
