06.03.2026 | 23:30
ԱՄՆ կոնգրեսականները պահանջում են հետաքննել Վաշինգտոնում Ալիևի անվտանգության աշխատակիցների հետ կապված միջադեպը
Թուրքիայի մեջլիսի նախագահը Բաքվում խոսել է Արցախից ու Հայոց ցեղասպանության բանաձևից
Քաղաքականություն
18.12.2019 | 20:37
Թուրքիայի խորհրդարանի (մեջլիս) նախագահ Մուստաֆա Շենթոփը Բաքվում անցկացվող Թյուրքախոս երկրների խորհրդարանական վեհաժողովին (TURKPA) մասնակցելու նպատակով գտնվում է Ադրբեջանում: Վեհաժողովում ելույթ ունենալիս Շենթոփն անդրադարձել է միաժամանակ և՛ արցախյան հակամարտությանը, և՛ օրեր առաջ ԱՄՆ-ի Սենատի կողմից Հայոց ցեղասպանության ճանաչմանը:
Արցախի հարցում մեջլիսի նախագահը կրկնել է ամեն առիթով թուրք պաշտոնյաների կողմից հնչեցվող ադրբեջանամետ լուծման թեզերը՝ մասնավորապես ասելով: «Մենք միշտ ասում ենք, որ Լեռնային Ղարաբաղի հարցը պետք է լուծվի Ադրբեջանի տարածքային ամբողջականությունը և ինքնիշխանության իրավունքը հարգելու համատեքստում: Ցավով ենք ընդունում այս հարցում աշխարհի անտարբերությունը և hայերի օգտին ընդունվող բանաձևերը»,- ասել է Շենթոփը:
Անցում կատարելով Սենատում Հայոց ցեղասպանությունը ճանաչող բանաձևի ընդունմանը՝ թուրք բարձրաստիճան պաշտոնյան ասել է, որ իրենք ճիշտ չեն գտնում այդպիսի հարցերում խորհրդարանների կողմից որոշումներ կայացնելը:
«Այստեղ ոչ վաղ անցյալում մեծ կոտորած (նկատի ունի Խոջալուի դեպքեր-խմբ.) է տեղի ունեցել: Ցավալի է ու քննադատության արժանի այն, որ դրա մասին չեն խոսում կամ մոռացել են: Եթե կոտորածների խնդրում չորդեգրվի անկողմնակալ և սկզբունքային դիրքորոշում ու կիրառվեն երկակի չափանիշներ, ապա աշխարհում հնարավոր չի լինի ապահովել խաղաղություն ու անվտանգություն: Մենք ճիշտ չենք համարում խորհրդարանների կողմից պատմական թեմաների վերաբերյալ որոշումներ կայացվելը: Այդ որոշումը քաղաքական է»,- եզրափակել է Շենթոփը:
