03.10.2026 | 15:39
Բացահայտվել է Flydubai-ի չվերթում երկրորդ օդաչուին դանակահարած օդաչուի ինքնությունը
«Wizz Air»-ը չվերթներ կիրականացնի Հայաստանից, տոմսի արժեքը կսկսվի 24.99 եվրոյից
Տնտեսություն
16.12.2019 | 13:16
2020 թվականի ապրիլից «Wizz Air» բյուջետային ընկերությունը չվերթներ կիրականացի երկու ուղղություններով՝ Վիեննա և Վիլնյուս։ Այս մասին լրագրողների հետ զրույցում տեղեկացրեց «Wizz Air» ընկերության կորպորատիվ համագործակցության ղեկավար Անդրաս Ռադոն։
«2 քաղաքներն էլ շաբաթական երկու անգամ ենք չվերթներ իրականացնելու։ Գները լինելու են իսկապես շատ ցածր՝ սկսվելու են 24․99 եվրոյից։ Արդեն առցանց ամրագրումներ կարող եք անել։ Այս երկու ուղղությունները 63․000 նստատեղ կավելացնեն օդանավակայանի թողունակությունում: Մենք շատ ուրախ ենք, որ, ի վերջո, այստեղ ենք։ Հուսով եմ՝ սա մեր հետագա համագործակցության սկիզբն է»,- նշեց Անդրաս Ռադոն։
Քաղաքացիական ավիացիայի կոմիտեի նախագահ Տաթևիկ Ռևազյանն էլ նախ շնորհակալություն հայտնեց և ընդգծեց, որ ամենակարևորը, որ ակնկալվում է «Wizz Air»-ի հետ կապված, որ մեծ աճ է լինելու, և այդ աճից Հայաստանը նույնպես օգուտ կստանա։
Հարցին, թե բացի այս երկու ուղղություններից, այլ ուղղություններ կլինե՞ն, Անդրաս Ռադոն նշեց, որ իրենք միշտ հետաքրքրված են նոր ուղղություններում և իրենց վերջնական նպատակն ընդամենը 2 ուղղություն իրականացնելը չէ։
«Մենք միշտ հետաքրքրված ենք մեր ցանցն ընդլայնելով, սակայն այս պահին որևէ հստակ բան չեմ կարող ասել»,- նշեց նա։
Իսկ այն հարցին, թե ինչպե՞ս են կարողացել գրավել «Wizz Air»-ին, Տաթևիկ Ռևազյանը պատասխանեց, որ իրենք որևէ բան չեն արել «Wizz Air»-ին գրավելու համար։
«Այն, ինչ մենք արել ենք, դա ավելի շատ ճկուն լինել՝ օրենքը փոխելու և մեկնման հարկի հետ կապված, որովհետև կա տոմս, որն արժե 25 եվրո և միաժամանակ վճարում եք 20 եվրո հարկ մեկնելու համար, դա ավիաընկերության համար ընդունելի չէ, ամեն դեպքում «Wizz Air» ընկերությանը խրախուսում են նույն հիմքերով, ինչպես ցանկացած այլ ավիաընկերության, որը չվերթներ է իրականացնում Հայաստանում»,- ասաց նա։
«Wizz Air» ընկերության կորպորատիվ համագործակցության ղեկավար Անդրաս Ռադոն նաև տեղեկացրեց, որ ներկայում ունեն 120 օդանավ, առաջիկայում նախատեսում է այն հասցնել 300-ի։
«Եթե այդքան լինի, 100 մլն ուղևոր կկարողանանք տեղափոխել, կունենանք 10 հազար աշխատակից, տարեկան 2000 նոր աշխատակից: Տարեկան շահույթում ակնկալում ենք 1 մլրդ եվրո»,- իր խոսքը եզրափակեց Անդրաս Ռադոն։
