«Կարող են օրենքով տեղեկություն ստանալ բեզոարյան այծի գտնվելու վայրի մասին ու գնալ որսի». Դավիթ Գրիգորյան. ՏԵՍԱՆՅՈՒԹ

Ի՞նչ կլինի, եթե որևէ մեկը դիմի Շրջակա միջավայրի նախարարություն և Տեղեկատվության ազատության մասին օրենքով պահանջի տեղեկություն՝ Կարմիր գրքում գրանցված կենդանատեսակների բնակության վայրերի մասին և, օրինակ, այդ տարածքներոմ ապօրինի որս իրականացնի։ Այս մասին այսօր՝ «Տեղեկատվության ազատության մասին» օրենքի փոփոխություն՝ առանց տեղեկատվության ազատության. քաղհասարակությունը մտահոգ է» թեմայով քննարկման ընթացքում նշեց Շրջակա միջավայրի նախարարության մամուլի քարտուղար Դավիթ Գրիգորյանը:

«Մեծագույն խնդիրն այստեղ այն է, որ այս քննարկումը միանգամից հանրային հարթակ է տեղափոխվել։ Օրենքի փոփոխության հետ կապված Շրջակա միջավայրի նախարարությունում քննարկում անցկացնելու հետ կապված որևէ դիմում հասարակական սեկտորի կողմից չի եղել։ Վստահ եմ, որ Շրջակա միջավայրի համապատասխան ստորաբաժանումների ղեկավարների հետ հանդիպումներով հնարավոր էր շտկումներ անել օրենքի նախագծի մեջ։ Բայց նման հանդիպման առաջարկ չի եղել։ Այս հարցը միանգամից հանրային դաշտ տեղափոխելու մեջ ես, անկեղծ ասած, այլ միտում եմ տեսնում»,- ասաց Շրջակա միջավայրի նախարարի խոսնակը։

Նշենք, որ ՀՀ շրջակա միջավայրի նախարարությունը դեկտեմբերի 2-ին շրջանառության մեջ է դրել «Տեղեկատվության ազատության մասին» ՀՀ օրենքում լրացումներ կատարելու մասին օրենքի նախագիծը՝ առաջարկելով օրենքում սահմանել «բնապահպանական տեղեկատվություն» եզրույթը և բնապահպանական տեղեկության տրամադրման մերժման հիմքերը: Մասնավորապես, առաջարկվում է օրենքի 8-րդ հոդվածը լրացնել հետևյալ բովանդակությամբ. «Տեղեկատվություն տնօրինողը կարող է մերժել բնապահպանական տեղեկության տրամադրումը, եթե այն վերաբերում է բուսական և կենդանական աշխարհի հազվագյուտ տեսակների բազմացման վայրերին»։

Մանրամասները՝ տեսանյութում։

Նելլի Մելքոնյան