Միանում ենք շնորհավորանքներին, բայց, ափսոս, վերջին նիստը չէ․ Արարատ Միրզոյանը՝ Էդմոն Մարուքյանին. ՏԵՍԱՆՅՈՒԹ

Ազգային ժողովում շարունակվում է արտահերթ նիստը։ «Լուսավոր Հայաստան» խմբակցության ղեկավար Էդմոն Մարուքյանը հանդես եկավ ելույթով և շնորհավորեց բոլորի գալիք Նոր տարին։

«Առիթից օգտվելով, քանի որ վերջին նիստն է և վերջին հնարավորությունն է այս տարվա, ուզում եմ շնորհավորել մեզ բոլորիս գալիք Ամանորի և Սուրբ ծննդյան տոների առիթով։ Իրապես բուռն քաղաքական տարի ենք ունեցել, խորհրդարանն այլևս մեկ տարեկան է և կարծում եմ՝ բոլորս մեզ վրա զգում ենք, թե ինչ բարձր պատասխանատվություն կա մեր ուսերի վրա դրված, թե ինչ սպասելիքներ և ակնկալիքներ կան ՀՀ քաղաքացիների կողմից այս լեգիտիմ Ազգային ժողովի կողմից սպասված։ Մեր բոլոր քաղաքացիներին ուզում եմ վստահեցնել, որ մեր բոլոր քննարկումները, բանավեճերը միտված են եղել և ապագայում էլ միտված են լինելու ՀՀ-ն զարգացնելուն, մեր տնտեսությունը հզորացնելուն և հզոր տնտեսության վրա հզոր բանակին հենվելու հնարավորություն տալու և իրապես երկիրն առաջ տանելու առումով։ Վերջում ուզում եմ շնորհավորել ՀՀ պետական սահմաններում, Արցախի Հանրապետության պետական սահմաններում կանգնած զինվորներին, նրանց ընտանիքներին, Զինված ուժերի սպաներին, գեներալներին, բոլոր հրամանատարներին և խաղաղ Ամանոր, նրանք բոլորն այնտեղ կանգնած են լինելու, իսկ մենք բոլորս նշելու ենք Ամանորը»,- ասաց Մարուքյանը։

Էդմոն Մարուքյանի ելույթից հետո ԱԺ նախագահ Արարատ Միրզոյանը նշեց, որ բոլորով միանում են այս ելույթին, բայց, ափսոս իհարկե, որ սա վերջին նիստը չէ։

Մանրամասները տեսանյութում։