22.01.2026 | 23:13
Կանխատեսվում է նորմայից բարձր ջերմաստիճան. Ազիզյան
Թուրք-ամերիկյան ճգնաժամի պատճառով Ստամբուլի բորսայի ինդեքսը նվազել է 2․3 տոկոսով
Քաղաքականություն
13.10.2017 | 20:48
Թուրք-ամերիկյան ճգնաժամը մեծ ազդեցություն է ունեցել երկու երկրների ֆինանասական հարաբերությունների վրա. փոխանցում է ermenihaber-ը:
Թուրքական «Ekonomi haber» լրատվակայքի տեղեկացմամբ՝ մինչև վիզաների դադարեցումը դոլարի փոխարժեքը հավասար էր 3․58 թուրքական լիրայի, իսկ ճգնաժամի ամենալարված պահերին այդ ցուցանիշը հասել էր անգամ մինչև 3․92 լիրայի։
Ճգնաժամը կտրուկ տատանումներ է առաջացրել նաև Ստամբուլի բորսայում․ բորսայի ինդեքսը կտրուկ նվազել է 2․3 տոկոսով, իսկ պարտատոմսերի տոկոսադրույքները հասել են մինչև 12․43 տոկոսի։ Այս ամենի պատճառը քաղաքական խնդիրների հետևանքով ԱՄՆ-ի և ԱՄՆ քաղաքացիների մոտ իրենց թուրքական ներդրումների համար առաջացած մտահոգությունն է։
Թուրքիայում ԱՄՆ-ի կողմից կատարված ուղղակի նեդրումների, գնված պետական պարտատոմսերի, Ստամբուլյան բորսայում ունեցած բաժնետոմսերի, թուրքական բանկերին և ընկերություններին տրված պարտքերի ընդհանուր արժողությունը կազմում է 58․1 մլրդ դոլար։ Իսկ Թուրքիան իր հերթին ԱՄՆ պետական և մասնավոր սեկտորում ունի 56․7 մլրդ դոլարի կարողություն։
Միայն Ստամբուլյան բորսայում ԱՄՆ-ին պատկանող բաժնետոմսերի ընդհանուր արժեքը 73․1 մլրդ լիրա է կամ շուրջ 20․8 մլրդ ԱՄՆ դոլար, ինչը հավասար է բորսայում օտար ներդրումների (52 մլրդ դոլար) գրեթե կեսին։ Ստամբուլյան բորսայում ամենամեծ բաժնեմաս ունեցող երկրորդ պետությունը Անգլիան է (9 մլրդ դոլար)։
2002-2017թթ․ ընթացքում ԱՄՆ-ից Թուրքիայում կատարված ուղղակի ներդրումների ծավալը կազմել է 11․3 մլրդ դոլար։ Այսպիսով, ԱՄՆ-ը Թուրքիայում ամենաշատ ուղղակի ներդրումներ կատարող երկրորդ երկիրն է՝ Հոլանդիայից հետո։ ԱՄՆ բանկերի ու հիմնադրամների կողմից թուրքական բանկերին ու մասնավոր սեկտորին տրված վարկերի ընդհանուր արժեքը կազմում է 19․9 մլրդ դոլար։
Թուրքիան ԱՄՆ-ում ունի 454 մլն դոլարի պարտատոմսեր, 301 մլն դոլարի բաժնետոմսեր, իսկ Թուրքիայից ԱՄՆ-ում կատարված անմիջական ներդրումների ընդհանուր արժեքը հավասար է 1․625 մլրդ դոլար։ Թուրքիայի քաղաքացիների կողմից օտար երկրներում կատարված ներդրումների ընդհանուր ծավալը կազմում է 31 մլրդ դոլար։ Իսկ Թուրքիայի կողմից գնված ԱՄՆ գանձապետական պարտատոմսերի ընդհանուր արժեքը հասնում է 54․3 մլրդ դոլարի։
