14.12.2025 | 17:25
Իրավիճակը ճանապարհներին՝ 17։15-ի դրությամբ
Այսպիսի կենտրոններ պետք է ունենանք Հայաստանի բոլոր մարզերում․ Զարուհի Բաթոյանը ներկա էր Շենգավիթի համալիր սոցծառայությունների տարածքային կենտրոնի բացմանը
Հասարակություն
11.12.2019 | 17:04
Մեզ համար շատ կարևոր է Հայաստանի Հանրապետության քաղաքացու համար արժանապատիվ աշխատանքի պայմաններ ստեղծելը և վստահ եմ, որ այդպիսի պայմաններ են ստեղծված նաև այս կենտրոնում։ Շատ կարևոր է ծառայություններ ստանալու համար հատկապես արժանապատիվ պայմանների ստեղծումն ամենախոցելի և ամենաշատը մեր կարիքը զգացող քաղաքացիների համար։ Այս մասին այսօր ՀՀ աշխատանքի և սոցիալական հարցերի նախարարության Շենգավիթի համալիր սոցիալական ծառայությունների տարածքային կենտրոնի բացման ժամանակ ասաց նախարար Զարուհի Բաթոյանը։
Նա տեղեկացրեց, որ Համաշխահային բանկի աջակցությամբ՝ վարկային ծրագրով հերթական կենտրոնն է բացվում Երևանում, որն ամենամեծերից մեկն է։
«Կենտրոնը տարեկան ծառայություններ կմատուցի ավելի քան 15․000 մարդու։ Շնորհակալ եմ Համաշխարհային բանկին այս նպատակի համար ՀՀ կառավարության կողքին լինելու համար, որովհետև մեր ծրագիրը շարունակվում է, և մենք այսպիսի կենտրոններ պետք է ունենանք Հայաստանի բոլոր մարզերում։ Մենք նաև կառուցվածքային փոփոխություն ենք իրականացնում և արդեն Ազգային ժողով ենք ուղարկել օրենքի փոփոխության նախագիծը, որով ստեղծում ենք ինտեգրված սոցիալական ծառայությունների միասնական կենտրոն»,- տեղեկացրեց ՀՀ աշխատանքի և սոցիալական հարցերի նախարարը։
Զարուհի Բաթոյանի տեղեկացմամբ՝ այստեղ աշխատելու են 4 ծառայություններ՝ Հաշմանդամություն ունեցող անձանց կարիքի գնահատման, Զբաղվածության գործակալությունը, Սոցիալական աջակցման տարածքային կենտրոնը, ինչպես նաև կենսաթոշակային ապահովությունը։
Համաշխարհային բանկի ներկայացուցիչն իր հերթին շնորհակալություն հայտնեց կենտրոնի բացմանը հրավիրելու համար։
«Վերջին տասնամյակի ընթացքում Համաշխարհային բանկն աջակցություն է տրամադրել ողջ երկրում համալիր ծառայությունների ապահովմանը նմանատիպ կենտրոնների ստեղծման միջոցով։ Այս կենտրոնները ստեղծվում են՝ գալով փոխարինելու առանձին-առանձին ծառայությունները, որոնք կան՝ զբաղվածություն, սոցիալական ապահովություն և այլն։ Հասկանում ենք, որ արդեն կան պլաններ վերկազմակերպման միջոցով ստեղծելու միասնական գործակալություն՝ կենտրոնական մակարդակում, որը կկարգավորի այս բոլոր ծառայությունները։ Գտնում ենք, որ համալիր սոցիալական ծառայությունների տրամադրման հարցում միասնական գործակալությունը շատ կարևոր դերակատարում կունենա»,- ասաց Համաշխարհային բանկի ներկայացուցիչը։
