07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
900 հոգուց գանձվել է անդամավճար, որոնք արհմիության անդամ չեն էլ եղել. ԵՊՀ ռեկտորի ԺՊ-ն՝ իր և արհմիության խնդիրների մասին
10.12.2019 | 18:10
«Սուտ են խոսում»,- Factor.am-ի հետ զրույցում այսպես արձագանքեց ԵՊՀ ռեկտորի ժամանականավոր պաշտոնակատար Գեղամ Գևորգյանը՝ անդրադառնալով հարցին՝ արդյո՞ք իր և իր ներկայացուցիչների կողմից կիրառվում են վարչական լծակներ, որպեսզի աշխատակիցները դուրս գան համալսարանի արհմիության կազմից։
Նշենք, որ ԵՊՀ արհեստակցական կազմակերպությունը հայտարարություն է տարածել, որում նշված է, թե վերջին օրերին ԵՊՀ արհկոմիտե են դիմում բազմաթիվ դասախոսներ, ամբիոնի վարիչներ և այլ աշխատողներ՝ նշելով, որ իրենց հորդորում և ստիպում են դուրս գալ արհմիության շարքերից:
«Մեր դիտարկումները ցույց են տալիս, որ ռեկտորի ԺՊ-ն և իր ներկայացուցիչները, կիրառելով տարբեր վարչական լծակներ մի շարք ստորաբաժանումների ղեկավարների, այդ թվում՝ որոշ դեկանների հանդեպ, փորձում են նրանց միջոցով ազդել ԵՊՀ արհեստակցական կազմակերպության անդամների վրա, որպեսզի վերջիններս հրաժարվեն արհմիության անդամությունից»,- նշված է հայտարարության մեջ:
Մեր դիտարկմանը, որ հայտարարության մեջ նաև նշված է, որ առաջիկայում ֆակուլտետների, ամբիոնների և վարչական ստորաբաժանումների «օպտիմալացման» կամ «արդյունավետության բարձրացման» անվան տակ սպասվում են աշխատատեղերի զանգվածային կրճատումներ և ԵՊՀ հարյուրավոր աշխատողներ կանգնած են լինելու աշխատանքը կորցնելու վտանգի առջև՝ Գեղամ Գևորգյանը նույն կերպ արձագանքեց. «Էլի սուտ է ասվում»։
Հստակեցնող հարցին՝ այսինքն՝ առաջիկայում կրճատումներ չե՞ն սպասվում, բուհի ռեկտորի պաշտոնակատարը պատասխանեց, որ նման բան չի կարող սպասվել, որովհետև 2019-2020 թթ. հաստիքացուցակը վաղուց հաստատված է։
ԵՊՀ արհմիության տարածած հայտարարությունում խոսվում է նաև Գեղամ Գևորգյանի հետ խնդիրների առկայության մասին: «Արհկոմիտեի և ռեկտորի ԺՊ-ի միջև սուր խնդիրներ սկսեցին առաջանալ, այն բանից հետո, երբ արհեստակցական կազմակերպությունը առարկություն հայտնեց շուրջ 30 աշխատողի աշխատանքից ազատելու հարցում: Սրան հաջորդեց նոյեմբերի 25-ից ԵՊՀ Կոլեկտիվ պայմանագրի միակողմանի լուծման վերաբերյալ ռեկտորի ԺՊ-ի ծանուցումը, ինչը դատարանի կողմից արդարացիորեն կասեցվեց: Ակնհայտ է, որ այս քայլերի հիմնական դրդապատճառը եղել է աշխատողների հավելյալ իրավական երաշխիքներ ապահովող կառույցի և կոլեկտիվ պայմանագրի հնարավոր չեզոքացումը»,- նշվում է հաղորդագրությունում:
Ի պատասխան՝ Գևորգյանը նշեց, որ խնդիրները ծագել են այն բանից հետո, երբ 2019 թվականի հուլիսի 8-ին ինքը հրաման է ստորագրել, որ ովքեր ուզում են՝ արհմիության անդամավճարները գանձվեն հաշվապահության միջոցով, պետք է հաշվապահություն դիմում գրեն։
«Արդյունքում պարզվեց, որ առնվազն 900 հոգուց գանձվել է անդամավճար, որոնք արհմիության անդամ չեն եղել։ Դա եղել է տարիներ շարունակ։ Ես դրա դեմն առել եմ, որի համար նրանք սկսել են խիստ անհանգստանալ։ Եվ հիմա կան մարդիկ, որոնք դուրս են գալիս արհմիությունից, լրացուցիչ մարդիկ՝ բացի այդ 900 հոգին»,- նշեց ԵՊՀ ռեկտորի ժամանակավոր պաշտոնակատարը:
