Քաղաքականություն
10.12.2019 | 14:17
ՌԴ նախագահ Վլադիմիր Պուտինը գոհ է Փարիզում անցկացված հանդիպումների արդյունքներից, այդ թվում՝ «նորմանդական քառյակի» գագաթնաժողովից: ՏԱՍՍ-ի փոխանցմամբ՝ այս մասին նա ասել է Ուկրաինայի նախագահ Վլադիմիր Զելենսկու հետ հանդիպումից հետո լրագրողների հարցին ի պատասխան:
Ուկրաինացի պաշտոնակցի հետ հանդիպումը Պուտինը գնահատել է «լավ և գործնական»:
Նա նաև կարծիք է հայտնել, որ ուկրաինական ճգնաժամի կարգավորման գործընթացում «ջերմացում» կա, այն ճիշտ ուղղությամբ է ընթանում:
«Նախ՝ արդեն տեղի է ունեցել ձերբակալված անձանց փոխանակում: Մենք հասել ենք երեք կետում ուժերի դուրսբերման: Մենք հանդիպեցինք «նորմանդական ձևաչափով» և քննարկել շատ կարևոր հարցերի լայն շրջանակ, որոնց մեծ մասով առաջընթացի ենք հասել»,- հանդիպման արդյունքներով հրավիրված ասուլիսում թվարկել է Պուտինը:
Նա նաև ընդգծել է, որ Ռուսաստանը կանի ամեն ինչ, որպեսզի բոլոր խնդիրներն ու չլուծված հարցերն արդյունքում իրենց լուծումը գտնեն: Նրա խոսքով՝ ամենակարևորն այն է, որպեսզի հակամարտող կողմերն ուղղակի երկխոսության մեջ լինեն. «Աշխարհում ոչ մի հակամարտություն չի լուծվել առանց հակամարտող կողմերի միջև ուղղակի երկխոսության»:
Ուկրաինայի նախագահ Վլադիմիր Զելենսկին, իր հերթին գնահատելով փարիզյան հանդիպումը, խոստովանել է, որ իր համար «դժվար էր պայմանավորվել», քանի որ ՌԴ նախագահը մանրամասն դիտարկվում էր յուրաքանչյուր քննարկվող հարց:
Նա նշել է, որ ինքն ու Պուտինը տարբեր են, սակայն ընդգծել է՝ զգացել է, որ ՌԴ ղեկավարը զիջումների է գնում: «Ինչ-որ զիջումներ եղան, ես դա զգում էի»,- ասել է Զելենսկին:
Զելենսկին, միաժամանակ, հայտարարել է, որ Փարիզում «նորմանդական քառյակի» առաջնորդների հետ հանդիպումից հետո պայմանական հաշիվը «ոչ ոքի» է:
