12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Կառավարությունում շարունակվում են գերատեսչությունների բյուջետային հատկացումների հայտերի քննարկումները
Տնտեսություն
06.12.2019 | 14:53
Վարչապետ Նիկոլ Փաշինյանի գլխավորությամբ կառավարությունում շարունակվում են գերատեսչությունների բյուջետային հատկացումների հայտերի քննարկումները:
«Բարձր տեխնոլոգիական արդյունաբերության նախարար Հակոբ Արշակյանը նշել է, որ իր գլխավորած գերատեսչության հայտը բխում է բարեփոխումների, առկա խնդիրների լուծման և առաջնահերթությունների իրականացման համատեքստից:
Անդրադառնալով գալիք տարվա ծրագրերին՝ նախարարը հավելել է, որ նախատեսում են իրականացնել մասնավոր-բուհ համագործակցությամբ մի քանի հազար մասնագետների վերապատրաստում, նորարարական դրամաշնորհների նախագծեր, կազմակերպել ձեռներեցության և բիզնես դասընթացներ, ներդնել Սփյուռքի կարողությունների ներգրավման մեխանիզմներ, տալ Ազգային վենչուրային ֆոնդի մեկնարկը, ոլորտ ներգրավել միջազգային կառավարիչների: Նախատեսվում են նաև մարզերում տեխնոպարկերի զարգացման նոր ծրագրեր, Ինժեներական քաղաքում սկսել շինարարական աշխատանքները: Նախարարի խոսքով՝ վարչապետ Նիկոլ Փաշինյանի՝ Սիլիկոնյան հովիտ այցի արդյունքում պայմանավորվածություն է ձեռք բերվել այնտեղ ստեղծել հայկական անկյուն և միջավայր, որտեղ իրենց կարողությունները զարգացնելու հնարավորություններ կստանան հայաստանյան մասնագետները:
Անդրադարձ է կատարվել նաև ռազմարդյունաբերության ոլորտում նախատեսվող ծրագրերին: Նշվել է, որ ոլորտում իրականացվելու են մեծածավալ գիտահետազոտական ծրագրեր, ընթացքի մեջ են պետություն-մասնավոր հատված համագործակցությամբ ռազմարդյունաբերական արտադրական հնարավորությունների զարգացման ու նոր նմուշների մշակման ուղղությամբ իրականացվող աշխատանքները: Մասնավոր ընկերությունների մասնակցությամբ նոր ներդրումային ծրագրեր իրականացնելու նպատակով նույնպես տարվում են համապատասխան աշխատանքներ:
Անդրադարձ է կատարվել նաև կապի և հեռահաղորդակցության ոլորտում նախատեսվող ծրագրերին:
Վարչապետ Նիկոլ Փաշինյանը կարևորել է վերը նշված ոլորտներում արդյունավետ ծրագրերի ու զարգացմանը միտված կոնկրետ քայլերի իրականացումը:
Քննարկվել է նաև Ազգային անվտանգության ծառայության 2020 թ. պետական բյուջետային հատկացման հայտը»,- ասված է հաղորդագրությունում:
